ލިބިފައިވާ އިލްމާއި ފަންނީ ހުނަރުން، ގައުމަށް ޚިދުމަތް ކުރުމަކީ ކޮންމެ ދިވެހި ދަރިއެއްގެ ގައުމީ ވާޖިބެއްގެ ގޮތުގައި ދެކުމަށް ނައިބު ރައީސް ހުސައިން މުހައްމަދު ލަތީފް އިސްލާމިކް ޔުނިވާސިޓީގެ 2024 ވަނަ އަހަރުގެ ދަސްވެނިވުމުގެ ހަފްލާގައި ވިދާޅުވެއްޖެއެވެ.

ނައިބު ރައީސް މިހެން ވިދާޅުވުމުން އެންމެ ފުރަތަމަވެސް އުފެދިގެންދާ ސުވާލަކީ ކޮންމެ އަހަރަކު ދަސްވެނިވެ ގާބިލު ދަރިންތަކެއް ވަޒީފާގެ މާހައުލަށް ނުކުންނަމުން ދާއިރު އެ ކުދިންނަށް ލިބިދޭންޖެހޭ ހައްގު ފުރުސަތުތައް ލިބޭނެ ގޮތްތަކެއް ފަހިކޮށްދެވިފައިވޭތޯއެވެ.

އިލްމީ ގާބިލު ފަރާތްތައް ހިމަނައިގެން ފުރިހަމަ ވެރިކަމެއް ކުރައްވާނެ ކަމަށް ރައީސް އަދި ނައިބު ރައީސް ވެސް އިންތިޚާބު ދުވަސްވަރު ހަރު އަޑުން ގޮވާލަމުން ގޮސްފައިވާއިރު، ވެރިކަން ލިބުމާއި އެކު ހުރިހާ ވަޒީފާތަކެއް ބަހާލައިފައިވަނީ އާއިލާ މެންބަރުންނާއި ގާތް ރަހުމަތްތެރިންނަށެވެ. އިލްމާއި ހިލްމު އަދި ގައުމިއްޔަތު އެއް ފަރާތްކޮށް ފެނިގެން ދިޔައީ އަމިއްލަ އެދުން އިސްކުރެއްވި ތަނެވެ.

ޕީއެޗްޑީ އަދި މާސްޓަރސް ހައްދަވައިގެން ތިއްބެވި ބޭފުޅުން ވެރިކަމަށް ވަޑައިގެން އެއްވެސް ތައުލީމެއް ގާބިލް ކަމެއް ނެތް ފަރާތްތަކަށް ހައްގު ނޫން މަގާމުތައް ދީ، ހިތްވަރާއިއެކު ކިޔަވަމުންދާ ކުދިންނަށް ވަނީ ނުރަނގަޅު ނަމޫނާ ދައްކާފައެވެ.

މުޅި ސަރުކާރަށް ބަލާލިޔަސް ފެންނަމުން ދަނީ ނާގާބިލު މީހުންނާއި މަސްއޫލިއްޔަތު ހަވާލުކުރުމުން އެންމެ ފުރިހަމަގޮތުގައި ޒިންމާ އަދާނުކުރެވޭ ތަނެވެ.

މި ސަރުކާރުގެ ސިޔާސަތަކީ ތައުލީމުގެ ކަންކަމަށް ޚާއްސަ އިސްކަމެއް ދިނުން ކަމަށް ނައިބު ރައީސް ފާހަގަކުރައްވާފައިވާއިރު، ސަރުކާރުން ދައްކަމުން ދަނީ މުޅިން އެހެން މަންޒަރެކެވެ. އެހެންކަމުން، ދަސްވެނިވެ ވަޒީފާގެ މައިދާނަށް ނުކުންނަ މިފަދަ ގާބިލު ދަރިވަރުންގެ ކުރިމަތީގައި މިފަދައިން ވާހަކަދެއްކުމުގެ ކުރިން ސަރުކާރުން ނަމޫނާ ދައްކަން އެބަ ޖެހެއެވެ.