އިންޓަނޭޝަނަލް އެއިޑް ކެމްޕެއިން (އައިއޭސީ) އިން ޣައްޒާއަށް ދުވާލަކު 12 ހާސް ލީޓަރުގެ ފެން ފޯރުކޮށްދެމުން ގެންދާކަމަށް ބުނެފިއެވެ.

އެ ޖަމްޢިއްޔާއިން އެކްސްގައި ކުރި ޕޯސްޓެއްގައި ބުނެފައިވަނީ ޣައްޒާގެ އަވަށެއް ކަމަށްވާ ދައިރް-އަލް-ބަލަޙްގައި، މިދިޔަ މެއި މަހުގެ 30 ވަނަ ދުވަހުން ފެށިގެން ކޮންމެ ދުވަހަކުވެސް، ދުވާލަކު 12 ހާސް ލީޓަރުގެ ފެން ފޯރުކޮށްދެމުން ދާކަމަށެވެ.

އައިއޭސީއިން ބުނިގޮތުގައި ގެދޮރު ގެއްލުމުގެ ސަބަބުން ޣައްޒާގެ އެކި ސަރަހައްދުތަކުން ހިޖުރަކޮށްފައިވާ އެތަށް ބަޔަކު ދައިރް އަލް ބަލަޙް ގައި ދިރިއުޅެއެވެ.

އޭގެ ތެރެއިން ބައެއް މީހުންނަކީ އެކި ތަންތަނުން 9 ފަހަރަށްވުރެ ގިނަ ފަހަރު ހިޖުރަކޮށްފައި ތިބި މީހުންކަމަށާއި ގިނަ ބަޔަކު އެ އަވަށަށް ހިޖުރަކުރުމުގެ ސަބަބުން މުޅި އަވަށް ތޮށް ޖެހިފައިވާއިރު، އެ އަވަށަކީ ފެނުގެ ދަތިކަން ވަރަށް ބޮޑަށް ތަޙައްމަލު ކުރަމުންދާ ހިސާބެއްކަން އައިއޭސީއިން ވަނީ ބުނެފައެވެ.

އައިއޭސީން އަންނަނީ ފަލަސްތީނުގެ ރައްޔިތުންނަށް އެކި އެކި ގޮތްގޮތުން އެހީ ފޯރުކޮށްދެމުންނެވެ.