ވެރިކަމަށް އަންނަނީ ކޮންމެ ބަޔަކުވެސް ބޮޑެތި ވައުދުތައް ވުމަށްފަހުގައެވެ. އެގޮތުން ވޯޓު ހޯދުމުގެ ބޭނުމުގައި އެކި އެކި މީހުންނަށް ޓާގެޓްކުރެއެވެ. އެގޮތުން އަދުގެ ސަރުކާރުގެ ޝިކާރައަކަށް ވީ ހީވާގި މަސްވެރިންނެވެ. ވާނީވެސް އެހެންތާއެވެ.

ކުރީ ސަރުކާރުން މަސްވެރިންނާ ދޭތެރޭ ކަންތައް ކުރެއްވި ގޮތުން އެ މަސްވެރިންނަށް އައު ހުވަފެންތަކެއް ދެެއްކި ބަޔަކަށް ވޯޓު ދިނީއެވެ. މަސްވެރިންނާ ދޭތެރޭ ކުރީ ސަރުކާރުން ކަންތައް ކުރަމުން ގެންދިޔަ ގޮތުގެ ވާހަކަ އެންމެ އަޑުހަރުކޮށް ދެއްްކެވި އެއް ފަރާތަކީ އަދުގެ މަސްވެރިކަމާ ބެހޭ ވަޒީރު އަދި 19 ވަނަ ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމެވެ.

ޝިޔާމަކީ އަބަދުވެސް މަޖިލިސް ތަޅުމުގައި މަސްވެރިންގެ ހައްގުގައި ބަސްބުނެ ވަކާލާތު ކުރެއްވި އެއް މެމްބަރެވެ. އެކަން ދޮގުކުރާނެ އެކަކުވެސް ނެތެވެ. ރައީސް ޑރ މުހައްމަދު މުއިއްްޒު ވެރިކަމަށް އައުމަށްޓަކައި މަސްވެރިންނަށް މަސްކިރާތާ 48 ގަޑިއިރު ތެރޭގައި ފައިސާ ދޭނެކަމުގެ ވައުދުވިއެވެ. އެ ވައުދާއެކު މަސްވެރިންގެ ހައްގުގައި ހުންނެވި ޝިޔާމް އައްޔަންކުރެއްވީ އެމަނިކުފާނުގެ ކެބިނެޓަށެވެ. އާދެ. މަސްވެރިކަމާ ބެހޭ ވުޒާރާގެ ވަޒީރަށެވެ.

މަސްވެރިންނަށް ހީވީ އުޖާލާ ދުވަސްތަކެއް ފެންނާނެހެންނެވެ. ނަމަވެސް ކަންވެ ނިމި މިދަނީ އެޔާ ހިލާފަށެވެ. 48 ގަޑިއިރުގެ ތެރޭގައި މަސްވެރިންނަށް ފައިސާ ދޭނެ ކަމުގެ ވައުދާއެކު އައި ބަޔަކަށް މިއުޅެނީ މަސް ދެ މަސް ވާއިރުވެސް މަސްވެރިންނަށް ފައިސާ ނުދެވިގެންނެވެ.

މިކަން ނުކުރެވުނަސް ދައުލަތުގެ ފައިސާއިން ބޭކާރު ހަރަދުތައް ކުރުމުގައި ސަރުކާރުން އުޅެނީ އަވަދިނެތިއެވެ. ބައިނަލްއަގްވާމީ ކަނޑުތަކުގެ ދުވަސް ފާހަގަކުރުމުގެ ނަމުގައިވެސް ދައުލަތުގެ ފައިސާއިން ކުޅެނީ ނާޗަރަންގީއެވެ. މަސްވެރިން ބުރަ މަސައްކަތް ކޮށްގެން އުޖޫރަ ލިބޭތޯ އިންތިޒާރުގައި ތިއްބާ މި ވެރިން މިއުޅެނީ ކަނޑުމައްޗައް ސަކަރާތް ޖަހަން ނިކުމެއެވެ. ލަދެއް ހަޔާތެެއްވެސް ނެތީއެވެ.

މަސްވެރިން ނިކަމެތި ވީމާހެއްޔެވެ؟ މަސްވެރިން ކުރަނީ މަސައްކަތެއް ނޫންހެއްޔެވެ؟ އެއީ ގައުމަށް އެހާ މުހިންމު ބައެއް ނޫންހެއްޔެވެ؟ މަސްވެރިކަމަކީ އެންމެ މުހިންމު އެ ސިނާއަތައް ވާއިރު މަސްވެެރިކަން ކުރާ މަސްވެރިންނަށް ހިތުހުރި ގޮތަކަށް ކަންތައްކުރާ ސަބަބެއް ނޭނގެއެވެ.

މަސްވެރިންނަށް ފައިސާ އެންމެ ފަހުން ދީފައިވަނީ އޭޕްރިލް މަހުގެ 22 ވަނަ ދުވަހުއެވެ. މިކަން މިނިސްޓާރ ޝިޔާމް ވަނީ މީޑިޔާއަށް ތިލަކޮށްދެއްވާފައެވެ. ނަމަވެސް އޭގެފަހުން ފައިސާ ދޭނީ ކޮންދުވަހަކުންތޯ ސުވާލުކޮށް ކޮށް ވަރުބަލިވުމުން މިނިސްޓާރ ޝިޔާމް ވަނީ އަލްހާ އީދުގެ ކުރިން ފައިސާ ދޭނެ ކަމަށް ވިދާޅުވެފައެވެ. މިހާރު އަނެއްކާވެސް މަސްވެރިންވީ އީދުގެ ކުރިން ފައިސާ ލިބޭނެ ކަމުގެ އުންމީދުގައި، އިންތިޒާރުގައި ތިބެންށެވެ.

މަސްވެރިންގެ ހައްގުގައި އަބަދުވެސް ވަކާލާތުކުރެެއްވި ބޭފުޅެއް މަސްވެރިކަމާ ބެހޭ ވުޒާރާގެ ވަޒީރުކަމަށް އައުމުން ގިނަ ބަޔަކު ތިއްބެވީ އުންމީދުގައެވެ. ނަމަވެސް މިއަދު މިނިސްޓާރ ޝިޔާމް މަސްވެރިން ޑިސަޕޮއިންޓްކޮށްލައިފިއެވެ.ރައީސް މުއިއްޒަށް ވައުދެއް ނުފުއްދުނު. 48 ގަޑިއިރު ރައީސް މުއިއްޒަށް އޮޅިއްޖެއެވެ.