މަސްވެރިންނަށް ދޭން ޖެހޭ ފައިސާގެ ބޮޑު ބައެއް ކުރިއަށް އޮތް އަޟްހާ އީދުގެ ކުރިން ލިބޭނެ ކަމަށް ފިޝަރީޒް މިނިސްޓަރު ވިދާޅުވެއްޖެއެވެ.

ކަނޑުތަކުގެ ދުވަސް ފާހަގަކުރުމަށް ބާއްވާ އިވެންޓްތަކުގެ ތެރެއިން ވާހަކަދައްކަވަމުން މިނިސްޓަރ މިހެން ވިދާޅުވެފައިވާއިރު، އޭޕްރީލް 22 އިން ފެށިގެން މަސްވެރިންނަށް ފައިސާ ދޫކޮށްފައިނުވެއެވެ.

މިއީވެސް ސަރުކާރުން ޖައްސާ ސްކޭމް އެއް ކަމަށާއި މަސްވެރިންގެ ފައިސާ އެއްކޮށް ނުދެވިގެން އުޅެނީ ކީއްވެތޯ މަސްވެރިން އަންނަނީ ސުވާލުކުރަމުންނެވެ.

ރައީސްގެ ވައުދުފުޅާ އެއްގޮތަށް 48 ގަޑި އިރުގެ ތެރޭގައި މަހަށް ފައިސާ ދިނުން ހިމެނޭއިރު، ރައީސް ވައުދުވި އެއްވެސް ކަމެއް ރައްޔިތުންނަށް ކޮށްދޭ މަންޒަރެއް ނުފެނެއެވެ.

ސަރުކާރަށް އިތުބާރުކޮށް މަސްވެރިން އަދިވެސް މަސައްކަތް ކުރަމުން ދާއިރު، ސަރުކާރުގެ ބަހާއި އަމަލާއި ނުބައްދަލުވާ މަންޒަރު އަންނަނީ މަސްވެރިންނަށް ދައްކަމުންނެވެ.

ކޮންމެ ބައްދަލުވުންތަކުގައި ނުވަތަ އިވެންޓްތަކުގެއި މޮޅެތި ހެޑްލައިން ހެދުމަށްވުރެ އެ ބަޔަކަށް ހައްގުވާ ފައިސާ ނުހިފަހައްޓައި ދޫކުރުމަށް މަސްވެރިންގެ އިތުރުން އާންމުންވެސް އަންނަނީ ބުނަމުންނެވެ. މަސްވެރިންނަށް ފައިސާ ނުދޭ މައްސަލަ މިހާރު ގައުމީ ބޮޑު މައްސަލައަކަށް ވަނީ ވެފައެވެ.