ދިވެހި ސަރުކާރުގެ ވިސްނުން ހުރީ އިޒްރާއިލް ޕާސްޕޯޓު މަނާ ކުރަން ނޫން ކަން ހާމަވެއްޖެއެވެ.

އެގޮތުން ނަން ހާމަނުކުރުމަށް އެދި ފޮރިން މިނިސްޓްރީގެ އޮފިޝަލަކު ތޭރަ އޮންލައިނަށް މައުލޫމާތު ދީފައިވަނީ ސަރުކާރުގް ވިސްނުންހުރީ ދިވެހިރާއްޖެއިން އެކްޓިވް ޑިޕްލޮމެޓިކް ރިލޭޝަނެއް ނެތް ޤައުމުތަކުގެ ރައްޔިތުންނަށް ކުރިއާލައި ވިސާ ނުނަގައި ނުވަދެވޭ ގޮތް ހެދުމަށް ކަމަށެވެ.

ރާއްޖެއިން އެކްޓިވް ޑިޕްލޮމެޓިކް ރިލޭޝަނެއް ނެތް ޤައުމުތަކުގެ ތެރޭގައި އިޒްރޭލުވެސް ހިމެނެއެވެ.

ފޮރިން މިނިސްޓްރީގެ ތަފާތު 3 މަސްދަރަކުން "ތޭރަ އޮންލައިން"އަށް ކަށަވަރުކޮށްދީފައިވާ ގޮތުގައި ބޭރުގެ ހުރިހާ ގައުމުތަކަށް، ޚާއްސަކޮށް ޔޫރަޕުގެ ޤައުމުތަކަށްވެސް، އިސްރާއީލު ރައްޔިތުންނަށް ވިސާ ހޯދައިގެން ރާއްޖެއަށް އެތެރެވުން މަނާކުރަން ނުވިސްނާކަން ސަރުކާރުން އަންގާފައިވެއެއެވެ.

އެހެންކަމުން އެ ނިންމުމަކީ އިސްރާއީލު ރައްޔިތުންނަށް ރާއްޖެއަށް ނުވަދެވޭ ގޮތަށް ނިންމި ނިންމުމެއް ނޫންކަމާ، ވިސާ ހޯދައިގެން ރާއްޖެއަށް އިސްރާއީލު މީހުން ވަނުން މަނާކުރަން ސަރުކާރުން ވިސްނާފައިނުވާކަން ވަނީ ހާމަވެފައެވެ.

އެހެންކަމުން އިސްރާއީލު ޕާސްޕޯޓު ބޭންކޮށްފިކަމަށް ބުނެ ސަރުކާރާއި، ސަރުކާރަށް ތާއީދުކުރާ މަޖިލިސް މެންބަރުންނާއި، ޕީއެންސީގެ ސަޕޯޓަރުން ދައްކަމުންދާ ވާހަކަތަކަކީ އޮޅުވައިލުމެއްކަން މިވަނީ ހާމަވެފައެވެ.