ހުކުރު ދުވަހުގެ ރޭގަނޑުގެ ވަގުތެވެ. ސޯޝަލް މީޑިޔާ ފީނަނިކޮށް ލޮލުގައި އަޅައިގަތީ ވަރަށްވެސް ހިތްގައިމު މަންޒަރެކެވެ.

އާދެ، މަޖިލިސް ރައީސް އަބްދުއްރަހީމް އަބްދުﷲ އުފް އާންމު ނަމުން ނަމަ އަދުރޭ ނަށާ މަންޒަރެވެ. ދިވެހި ދިދައަކާއި އެކު ސަޤާފީ ކުޅިވަރުގެ ނެށުމުގައި ފައިހަމަކުރަމުން ދިޔައެވެ. ނެށުމުގެ ވައްޓަފާޅި ހެޔޮވަރުކަމުން ވަރަށް ސިއްރުން ކޮށްއުޅޭ ކަމެއްހެން ހީވިއެވެ.

އެހެނަސް މީސްމީޑިއާގައި ދައުރުވި އެ ވީޑިއޯ އާއި އެކު އާންމުންގެ ފާޑުކިޔުންތައް އިސާހިތަކު އަމާޒުވީ އެހާވެސް އަވަހަށެވެ.

މީސްމީޑިޔާގައި ފާޑުފަތި އަމުނަމުންދިޔަ ފަރާތްތަކުން އެންމެ ބޮޑަށް ހަގީގަތުގައި އެވާހަކަ އެެއް ދެއްކީވެސް އެއްވެސް ސަބަބެއް ނެތި އެއްވެސް ނޫނެވެ.

މީގެ އަހަރުތަކެއް ކުރިން ސިޔާސީ ހަރަކާތެއްގައި ކުރީގެ ރައީސް މުހައްމަދު ނަޝީދު (އަންނި) ބަބުރު ލަވައަކަށް ނެށި މަންޒަރު މީސްމީޑިއާގައި ވަނީ ދައުރުވެފައެވެ.

އެ މަންޒަަރު ބަލާފައި އަދުރޭއަކަށް ކެތެެއް ނުވިއެވެ. ބޮޑު ސިޔާސީ ހަތިޔާރަކަށް ހަދައި ވިދާޅުވީ އެއީ ދިވެހިންގެ ވެރިން ކުރާ ޒާތުގެ ކަންކަމެއް ނޫން ކަމަށާއި ވިދާޅުވީ ދިވެހިންގެ ވެރިންނަކީ އެއަށް ވުރެ އަބުރުވެރި ބައެއް ކަމަށެވެ. އަދި އަމުދުން ވެރިން ނެށުމަކީ ރީތި ނަމޫނާ އެއް ނޫންކަމަށް ވިދާޅުވެ އެޅުވީ "ލާދީނީ" ބޮޑު ޓެގެކެވެ.

އަންނި ދީނާ ހިލާފް ވާހަކަތައް ދެއްކެވީމާ ލާދީނީ އަށް ގޮވުމުން އެކަން ދެން ބުއްދި ގަބޫލުކުރިއެވެ. ނަމަވެސް ސަގާފީ ނެށުމެއް ނެށީމާ ލާދީނީ ވީ ސަބަބެއް ނޭނގުނެއެވެ.

އަދުރޭ ހިތުން ދެން އޭރު މޮޅު އެއްޗެއް ބުނެލީއެވެ. ސެންސް މޭކް ކުރުމާއި ނުކުރުން އެއީ އަދުރޭ އަށް މާ މުހިންމު ކަމެއް ނޫނެވެ.

މިއަދު އަންނި އަށް ލާދީނީއަށް ގޮވި ވެރިޔާ މި ފެނުނީ ހަމަ އެ މޭރުމުން ނަށާ މަންޒަރެވެ. މައްސަލައަކީ އަދުރޭ މިފަދަ ކަންކަމުގައި ދެ ނާޅިއަކުން މިނާ އުސޫލު ގެންގުޅޭތީއެވެ.

އަދުރޭ ނެށީމާ ޝާހީ ވެފައި ނުރުހޭ ސިޔާސީ ވެރިއެއް ކުރީމަ ލާދީނީ ވާ އުސޫލަކީ ކޮން ކަހަލަ އުސޫލެއްތޯއެވެ. އަދުރޭގެ އުސޫލްތައް އެނގިވަޑައިގަންނަވާނީ ހަމަ އަދުރޭއަށެވެ.

އަދުރޭ ނެށި ވީޑިޔޯތަކުގެ ކެޕްޝަން ކިޔާފައި ކިތަންމެ ބަޔަކު ޖޯކު ޖަހާނެއެވެ. އެގޮތުން" ރައީސް މުއިއްޒުގެ ރޯލް މޮޑެލް މިފަދައިން އުޅެންޏާ އެމަނިކުފާނުވެސް މިފަދައިން ނޫޅޭނެކަމެއް ނޭނގެ" މިއީވެސް ލޮޮލުގައި އަޅައިގަން ކެޕްޝަނެކެވެ.

އަދުރޭ އަށް މަޖިލިސް ރައީސްކަން ލިބުނީމާ ނަށާލުން މުހިންމުވީއެވެ. ނެށުމަކަށް އެެއްވެސް ހުރަހެއްނެތެވެ.

މައްސަލަ އަކަށް ވެގެން މިދިޔައީ ބަޔަކު ކުރީމާ ލާދީނީ އަށް ގޮވާފައި ތިމާމީހާވެސް އެ ގޮތައް އުޅުއްވީމައެވެ.

އަސްތާ، ދެން ކުރާނެ ކަމެއް ނެތެވެ. މިއަދު ދުނިޔޭގެ އަނެެއް ބިތުގައި ހުންނަވާ އަންނި ވެސް އަދުރޭއަށް ޖޯކު ނުޖަހާނެ ކަމެއް ނޭނގެއެވެ. ނެށުމުން މިއޮތީ އަދުރޭ ފޭހުނު އިލޮށި އަދުރޭގެ ލޮލަށް ހެރިފައެވެ.