މިއަދު މަސްވެރިންނަށް ދިމާވެފައިވާ ހާލަތަކީ ހިތި ބޭހެއް ބޯން ޖެހިފައިވާ ހާލަތެއްގެ ގޮތުގައި އެ މަސްވެރިން ސިފަކޮށްފިއެވެ.

އެޕްރިލް މަހުގެ 23 ވަނަ ދުވަހާ ހަމައިން ފެށިގެން މިއަދާ ހަމައަސް މަސްވެރިންނަށް ވަނި ކިރި މަހަށް ފައިސާ ނުދީއެވެ.

މިކަމަށް އިޝާރާތްކުރައްވާ ޒުވާން މަސްވެރިޔާ އަލީ ސާޖިދު އެކްސްގައި ކުރި ޕޯސްޓެއްގައި ވަނީ، 23 އޭޕުރީލް 2024 ފެށިގެން މަސްވެރިން ކިރުވި މަހަށްވާ ފައިސާ ކޮބާތޯ އަހާ ސުވާލެއް ސަރުކާރުގެ މަސް ކުންފުނި މިފްކޯއަށް އަމާޒުކޮށްފައެެވެ.

ސާޖިދުގެ ޕޯސްޓުގައި އޭނާ ވަނީ ސަރުކާރާ ދައުލަތުގެ ވެރިންނަށް މަސް ނިމުމުން އަމިއްލަ ދިރިއުޅުމުގައި ފުރިހަމަ ކުރަން ޖެހޭ ކަންކަން ހުންނަ ފަދައިން މަސްވެރިންވެސް ކޮންމެ މަހެއް ނިމުމުން ކުރަންޖެހޭ ޒަރޫރީ ހަރަދުތަކެއް ހުންނަ ކަމަށް ބުނެ ރައީސް މުހައްމަދު މުއިއްޒު ޓެގް ކުރައްވާފައެވެ.

މީގެ އިތުރުން ސާޖިދު ވަނީ ރައީސް މުއިއްޒުގެ ސްޕީޑަށް ވެސް ފާޑުކިޔާފައެވެ. އެގޮތުން މުއިއްޒު ސްޕީޑަކީ ވަަށް ދަށް ސްޕީޑެއްގެ ގޮތިގައި ސިފަކޮށްފައިވެއެވެ. މަސްވެރިން މިއަދު މިތިބީ ހިތި ބޭހެއް ބޯންޖެހިފައި ކަމަށާ 48 ގަޑިއިރުތެރޭގައި ދޭން ވައުދުވި ފައިސާ ވެރިކަމަށް އައިސް 6 މަސްވީއިރު ދޫނުކުރެވުމުން ލަދު ނުގަނެތޭވެސް ސާޖިދު ވަނީ ރައީސް މުއިއްޒަށް އަމާޒުކުރި ސުވާލެއްގައި އަހާފައެވެ.

ހަަމައެހެންމެ މަސްވެރިން ދައްކަމުން ދަނީ އެމީހުންނަށް ގާނޫނީ ހުރަހެއްނެތި ކޮންމެހެންވެސް ދޫކުރަންޖެހޭ ބުރަ މަސައްކަތުގެ ފައިސާކޮޅުގެ ވާހަކަކަމަށް ބުނެ ފިޝަރީޒު މިނިސްޓްރީވެސް ޓެގްކޮށްފައިވެއެވެ.

ޒުވާން މަސްވެރިންގެ މިފަދަ ކަންބޮޑުވުން ހުރިއިރު، ދައުލަތުގެ ބަޖެޓުން ސަރުކާރުން ދަނީ ސިޔާސީ ބޭނުމަށް ބޭކާރު ޚަރަދުތައް ކުރުމާއި، ކޮރަޕްޝަން އަށް މަގުފަހިވާ އެތައް ކަމެއް ރައްޔިތުންގެ ޓެކްސް ފައިސާއިން ހިންގަމުންނެވެ.

މަސްވެރިންނަށް ދޭންޖެހޭ ފައިސާ ނުދީގެން މަސްވެރިން ހިތްހަމަ ނުޖެހުން ފާޅުކުރަމުން ދިޔަ ނަމަވެސް މަސްވެރި ވަޒީރުގެ މާބޮޑު ސަމާލުކަމެއް އެކަމަށް ދެއްވާ މަންޒަރެއް ނުފެނެއެވެ.