ރައްޔިތުންގެ މަޖިލީހުގެ މެޖޯރިޓީ ލީޑަރަކަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހް އަދި މައިނޯރިޓީ ލީޑަރަކަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ކަނޑައަޅައިފިއެވެ.

މިއަދު ބޭއްވި މަޖިލީހުގެ ޖަލްސާގައި، މަޖިލިހުގެ މެޖޯރިޓީ ލީޑަރާއި މައިނޯރިޓީ ލީޑަރު އިއުލާނު ކުރެއްވީ މަޖިލިހުގެ ރައީސް އަބްދުއްރަހީމް އަބްދުﷲއެވެ.

މެޖޯރިޓީ ލީޑަރަކާއި މައިނޯރިޓީ ލީޑަރަކު ހުންނަން ޖެހޭކަމަކީ މަޖިލީހުގައި ބަޔާންކޮށްފައިވާ ކަމެކެވެ. މަޖިލިހުގެ މެޖޯރިޓީ ލީޑަރަކީ މަޖިލިހުގައި އެންމެ ގިނަ ގޮނޑި ކޮންޓްރޯލް ކުރާ ޕާޓީގެ މެމްބަރެވެ. އަދި މައިނޯރިޓީ ލީޑަރަކީ ދެވަނަ އަށް އެންމެ ގިނަ ގޮނޑި ކޮންޓްރޯލް ކުރާ ޕާޓީގެ މެމްބަރެކެވެ.

ވިހި ވަނަ މަޖިލިހުގައި 75 ގޮނޑިއާ އެކުގައި ސުޕަރ މެޖޯރިޓީ ލިބިފައި ވަނީ ވެރިކަން ކުރާ ޕީއެންސީއަށެވެ. ދެވަނަ އަށް އެންމެ ގިނަ ގޮނޑި ކޮންޓްރޯލް ކުރާ އެމްޑީޕީގައި 12 މެމްބަރުން ތިއްބަވައެވެ. ދެން ތިއްބަވަނީ އެމްޑީއޭގެ ދެ މެމްބަރަކާއި ޖުމްހޫރީ ޕާޓީގެ މެމްބަރަކާއި އެމްއެންޕީގެ މެމްބަރަކާއި މިނިވަން ދެ މެމްބަރުންނެވެ.