އިޒްރޭލުގެ ޕާސްޕޯޓު އޮންނަ މީހުން ރާއްޖެއަށް ޒިޔާރަތްކުރުން މަނާކުރަން ގާނޫނު އިސްލާހުކުރަން އިދިކޮޅު އެމްޑީޕީން ހުށަހެޅި ބިލު ދިރާސާކުރަން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ)އަށް މިއަދު ފޮނުވައިފިއެވެ.

މިގޮތަށް ނިންމާފައިވަނީ އިސްރާއީލް ޕާސްޕޯޓް މަނާކުރަން އިމިގްރޭޝަން ގާނޫނަށް އިސްލާހު ގެނައުމަށް އެމްޑީޕީން މަޖިލީހަށް ހުށަހެޅި ބިލު ދިރާސާކުރުމަށް 241 ކޮމިޓީ އަށް ފޮނުވަން ޕީއެންސީގެ ޕީޖީ ގްރޫޕުގެ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ހުށަހެޅުއްވުމާ ގުޅިގެންނެވެ.

އެ ހުށަހެޅުމަށް މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމާއި މާމިގިލި ދާއިރާގެ މެންބަރު ގާސިމް އިބްރާހީމް ވަނީ ތާއީދުކުރައްވާފައެވެ.

އެ ބިލު މަޖިލީހުގެ 241 ކޮމިޓީއަށް ފޮނުވުމަށް މިއަދު ނެގި ވޯޓުގައި ބައިވެރިވެވަޑައިގެން 88 މެންބަރުން ވަނީ ވޯޓު ދެއްވައިފައެވެ.

ފަލާހު ވިދާޅުވީ، އެ ބިލުގެ މަސައްކަތަކީ، އިހުލާސްތެރިކޮށް ކުރެވޭ މަސައްކަތަކަށްވާ ނަމަ، އެކަމުގައި އެއްބާރުލުން ދެއްވާނެ ކަަމަށެވެ. އެހެންކަމުން އެކަން ސަރުކާރާއި ރައްޔިތުން ބޭނުންވާ ގޮތަށް އަވަހަށް ނިންމުމަށް 241 ކޮމިޓީއަށް ފޮނުވަން ހުށަހަޅުއްވާ ކަމަށްވެސް ފަލާހު ވިދާޅުވިއެވެ. މިބިލު ފާސްކުރުމަށް ވޯޓަށް އަހާނީ ކޮމެޓީ މަރުހަލާ ނިމުމުންނެވެ.

އިޒްރޭލުގެ ޕާސްޕޯޓު އޮންނަ މީހުން ރާއްޖެއަށް ޒިޔާރަތްކުރުން މަނާކުރަން ގާނޫނު އިސްލާހުކުރާ ބިލު ހުށަހެޅުއްވީ ގަލޮޅު ދެކުނު ދާއިރާގެ، އިދިކޮޅު އެމްޑީޕީގެ މެންބަރު މީކާއީލް ނަސީމެވެ.

އިޒްރޭލު މައްސަލާގައި ސަރުކާރުން ބުނެފައިވަނީ، ރައީސްގެ ނިންމެވުމާއިއެކު އިސްރާއީލް ޕާސްޕޯޓު މަނާކުރުމަށް ކުރަންޖެހޭ ކަންކަން މަޖިލިސް ތެރެއިން އަވަހަށް ނިންމުމަށް މަސައްކަތް ކުރާނެކަމަށެވެ. އަދި މެންބަރު މީކާއީލް ހުށަހެޅުއްވި މައްސަލައަކީ ވެސް ދާދި އެއް މައްސަލައަކަށް ވާތީ އެއް މަގުސަދެއް ހާސިލުވާނަމަ އެ މައްސަލަ ހުށަހެޅި މީހަކަށް ނުބަލާނެ ކަމަށްވެސް ސަރުކާރުން ވަނީ ބުނެފައެވެ.

ނަމަވެސް މަޖިލީހަށް ހުށަނާޅާ ރައީށްގެ ގަރާރަކުންވެސް އިޒްރޭލު ޕާސްޕޯޓު މަނާކުރުމުގެ ބާރު ގާނޫނު އަސާސީއން ލިބިދީފައިވެއެވެ. އެއީ ޓެރަރިޒަމް މަނާ ކުރުމުގެ ގާނޫނުގެ ތެރެއިންނެވެ.

މިދިޔަ އޮކްޓޯބަރު މަހުގެ ހަތެއްގެ ފަހުން، އިޒްރޭލުން ވަނީ ޣައްޒާއަށް ދޭ ހަމަލާތައް ވަރަށް ބޮޑަށް ފުޅާކޮށްފައެވެ. ޣައްޒާގައި ވެރިކަން ކުރާ ހަމާސްއިން ދިން ހަމަލާއަކަށް ރައްދު ދިނުމަށް، ހަނގުރާމަވެރިން ގަތުލުކުރުމަށް ކަމަށް ބުނެ ދެމުން އަންނަ ހަމަލާތަކުގައި މިހާތަނަށް 36,800އަށް ވުރެ ގިނަ މީހުން ޝަހީދުކޮށްލާފައިވެއެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.