ނިމިދިޔަ ރައީސް އިބްރާހިމް މުހައްމަދު ޞާލިހްގެ ސަރުކާރުން ފަގީރުންގެ ދަފްތަރު ރިވިއު ކޮށްފައި ނުވާ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓާރ މިފަދައިން ވިދާޅުވެފައިވަނީ ހައްޖަށް ފުރާ ވަޑައިގަންނަވަން އެއަރޕޯޓުގައި ހުންނަވައިގެން މީޑިޔާއަށް ދެއްވި އިންޓަވިއުއެއްގައެވެ.
އެގޮތުން މިނިސްޓާރ ޝަހީމް ވިދާޅުވީ ކޮވިޑް-19އާ ގުޅިގެން ގިނަ ބައެއްގެ އާމްދަނީއަަށް އަސަރު ކުރިއިރު، ފަގީރުންގެ ދަފްތަރު އޭގެ ފަހުން ރިވިއުކޮށްފައި ނުވާ ކަމަަށެވެ.
ފަގީރުންގެ ލިސްޓު އާންމު ކޮށްފައި ވަނީ އޭގައި ޝަހުސީ މައުލޫމާތު ހުރުމާއި ގުޅިގެން ކަމަށާއި ހަމަ އެއާއިއެކު ހައްޖަށް ފޮނުވާފައި ވާ ލިސްޓުގައި އެއްވެސް އޮޅުވާލުމެއް ނޯންނާނެ ކަމުގެ ޔަގީންކަން މިނިސްޓާރ ޝަހީމް ވަނީ ދެއްވާފައެވެ.
ސަރުކާރުގެ ހަރަދުގައި ހައްޖަށްދާ 50 މީހުން ހޮވުމުގައި އިންސާފުން ބޭރުން އެއްވެސް ކަމެއް ކޮށްފައިނުވާނެ ކަމަށާއި، އެކަމުގައި އެއްވެސް މީހެއްގެ ނުފޫޒެއް ނޯންނާނެ ކަމަަށް ވެސް މިނިސްޓާރ ވިދާޅުވިއެވެ.
