މަސައްކަތައް ފައިސާ ނުލިބި ތިބި މަސްވެރިން އެމީހުންނަށް ހައްގު ފައިސާ ހޯދުމަށް ރައީސް ޑރ މުހައްމަދު މުއިއްޒުގެ އަރިހުން އާދޭސް ކުރަން ފަށައިފިއެވެ.
އެކްސްގައި ކުރި ޕޯސްޓެއްގައި މަސްވެރިޔަކު ވަނީ ފިޝަރީސް މިނިސްޓަރު އަހްމަދު ޝިޔާމް ކުރެއްވި ޕޯސްޓެއް ޝެއާ ކޮށް ރައީސް ޑރ. މުހައްމަދު މުއިއްޒު މަސްވެރިންގެ ފައިސާ ދެއްވާނީ ކޮންދުވަހަކުންތޯ ސުވާލުކޮށްފައިއެވެ.
މަސްވެރިން އުޅޭ ހާލު ރައީސް މުއިއްޒުއަށް ކުޑަކޮށްވެސް އިހްސާސް ކޮއްލެވޭތޯވެސް އެ މަސްވެރިޔާ ވަނީ ސުވާލުކޮށްފައިއެވެ.
މަސްވެރިން މިއަދު އެމީހުންގެ ޒަރޫރީ ބޭނުންތައް ފުއްދަން ނުދަރާ އެއްވެސް ތަނެއް ނެތްކަމަށްވެސް އޭނާ ވަނީ ބުނެފައިއެވެ.
އަދި އަނެއްކާވެސް ކޫއްޑޫ އޮޕަރޭޝަން ހުއްޓާލުމުން ނޫނީ މަސްވެރިންގެ ފައިސާ ނުލިބޭނެތޯވެސް އެ މަސްވެރިޔާ ވަނީ ސުވާލު އުފައްދާފައިއެވެ.
މަސްވެރިންނަށް ފައިސާ ދިނުމުގައި މި ސަރުކާރުން އިހުމާލުވާއިރު މި ސަރުކާރު ވެރިކަމަށް އައީ މަސްކިރާތާ 48 ގަޑިއިރު ތެރޭ މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.
އެންމެ ފަހުން މަސްވެރިންނަށް ފައިސާ ދީފައިވަނީ އޭޕްރިލް މަހުގެ 22 ވަނަ ދުވަހުގައި ކަމަށް ވަޒީރު އަހުމަދު ޝިޔާމް ވަނީ ވިދާޅުވެފައެވެ.
އެހެންކަމުން މަސްވެރިންނަށް ފައިސާ ނުލިބި މަހަކަށްވުރެ ގިނަ ދުވަސްވެފައިވާތީ މަސްވެރިން އަންނަނީ ފައިސާ އަވަސް މުއްދަތެއްގައި ދިނުމަށް ގޮވާލަމުންނެވެ.
