އީދަކީ ކޮންމެ މުސްލިމު އަޅަކަށް ވެސް ދުނިޔޭގައި ބައްދަލުކުރާނެ އެންމެ އުފާވެރި އެއް ދުވަސްކަން ޔަގީނެވެ. އެދުވަހުގެ އުފާ އާއިލާއެކު ފާޅުކޮށްލަން ޒަމާނުއްސުރެ ދިވެހިން އަމަލުކުރާ އާދަކާދައަކީ އީދަށް ރަށަށް ޖަމާވެ އެންމެ އެކުގައި އީދު ފާހަގަކުރުމެވެ.

އެގޮތުން ނިމިދިޔަ ކުޑަ އީދު ނުވަތަ ފިޠުރު އީދުގައިވެސް ލިބުނު ބަންދާ އަދި އޭގެ ފަހުން އައި ސްކޫލު ބަންދުގައިވެސް އަތޮޅު ތެރެއަށް ނިސްބަތްވާ އާއިލާތަކުން ރަށްރަށަށް ޒިޔާރަތްކުރިއެވެ. މާލޭއަށް ނިސްބަތްވާ ރައްޔިތުން ރާއްޖެއިން ބޭރަށަ އަދި ޗުއްޓީ ހޭދަކޮށްލުމަށް އަތޮޅު ތެރެއަށް ދަތުރުކުރިއެވެ.

މާލޭގެ ކުޑަ ކުޑަ ގޮޅިތަކުގައި ބަންދުވެފައި ތިބޭ ތިބުމަށް ކުޑަ ނަމަވެސް ރިލީފެއް އަންނަ ނަމަ އެގޮތް ބޭނުންނުވާނެ މީހަކު ނުހުންނާނެއެވެ. އެހެނީ އަތޮޅު ތެރެއަށް ދަތުރުކޮށް ތާޒާ ވަޔާއެކު ހިތްހަމަ ޖެހޭ މާހައުލެއް ދަރިންނަށްވެސް ހޯދައި ދެވޭތީއެވެ.

އެގޮތުން ކުރިއަށް މިއޮތީވެސް އެފަދަ ދުވަސް ކޮޅެކެވެ. ދުނިޔޭގައި މުސްލިމުންނާ ބައްދަލުކުރާނެ އެންމެ މާތް ދުވަސްތަކަށް ފަހު އީދުގެ އުފާވެރިކަން ވެސް ބައްދަލުކުރަނީއެވެ. އާދޭހެވެ. ހައްޖު މަހުގެ ފުރަތަމަ ނުވަ ދުވަހަށް ފަހު އަޟްޙާ އީދު ދިވެހިންނާވެސް އަދި ހުރިހާ މުސްލިމުންނާވެސް މި މަހުގެ 16ގައި ބައްދަލުކުރާއިރު، ރާއްޖޭގެ ހުރިހާ ހިސާބެއްގައިވެސް އީދުގެ ފޯރި ނަގާނެކަން ފެންނަ މަންޒަރުތަކުން ދަނީ ހާމަވަމުންނެވެ.

ނުނަގާނެ ކަމެއްވެސް ނެތްތާއެވެ. އެއީ އަހަރުމެން މުސްލިމުންގެ "ބޮޑު" ޢީދުތާއެވެ. ކުރިންވެސް ފާހަގަކުރި ފަދައިން އީދަށް ކިރިޔާވެސް ބަންދެއް ލިބޭނަމަ މީހުން އެކި ތަންތަނަށް ދަތުރުކުރެއެވެ. މި ފަހަރުގައި އީދު ބަންދަށް ގނަ ދުވަސްތަކެއް ލިބެއެވެ. 9 ދުވަސް ބަންދަށް ލިބޭއިރު ގަތް ރައްޓެހިން ކައިރިން މި ފަހަރު އީދަށް ދަނީ ކޮންތާކަށް ސުވާލުކޮށްލުމާ އެކު ފޫހި ރާގަކަށް ބުނަނީ އެއްވެސް ތާކަށް ދާން ބޭނުންނުވާ ކަމަށެވެ. ކީއްވެތޯ ސުވާލުކޮށްލުމުން ބުނަނީ ދެން ގޮއްސަ އައިސް އަނެއްކާވެސް ބޭނުންނުކުރާ ކަރަންޓަކަށް ބޮޑެތި އަދަދުތަކުން ފައިސާ ދައްކަން ޖެހޭނެތީ ކަމަށެވެ.

އަސްތާއެވެ. މިވާ ގޮތް އެހާ ހިސާބުން ހިތަށް ސިފަވިއެވެ. ތެދެކެވެ. އީދަށް ރަށްރަށަށް އާއިލާތަކުން އެންމެ ފަހުން ވެސް ދަތުރުކުރިއިރު މާލެވެސް ހިމެނޭހެން ގިނަ ރަށްތަކެއްގައި އީދަށް ކުލަ ބޮކިތައް ދިއްލާ ޒީނަތްތެރިކުރިއެވެ. އީދަށް ބޮކި ދިއްލާ ޒީނަތްކުރުމަކީ އުފާ ލިބޭ ކަމެކެވެ. ނަމަވެސް އޭގެ ބަދަލު ރައްޔިތުންގެ ކަރަންޓު ބިލުތަކުން ދައްކަން ޖެހުމަކީ ކަންބޮޑުވާ ކަމެއްކަމަށަ މިފަހަރުވެސް އެހެން ވެދާނެކަމުގެ ބިރު އެބައޮތް ކަމަށް ގިނަ ބަޔަކު ބުނެއެވެ.

އީދު އަންނަނީއެވެ. ހިނިތުންވަމުންނެވެ. މަގުތަކުގައި ކުލަ ބައްތިތަކާ ބޮކިތައް ދިއްލަލަމުންނެވެ. ރީތިވިހާ ކުލަތަކުން މަގުތައް ޖަރީކުރަމުންނެވެ. ނަމަވެސް ސުވާލަކީ ކަަރަންޓު ބިލަށް ވާނީ ކިހިނަކުންބާއެވެ؟