މަސްވެރިން މިއަދު ކުރަމުންދާ މުޒާހަރާގައި ބައިވެރިވުމަށް އެކި ސަރަހައްދުތަކުން ދަތުރުކުރި އުޅަނދުފަހަރުތަކުގައި މާލެ ސިޓީ ކައުންސިލުން ސްޓިކާ ޖަހައިފިއެވެ.

މިގޮތުން ސިޓީ ކައުންސިލުން ހާމަކޮށްފައިވާ ގޮތުގައި މަސްވެރިންގެ ސަރަހައްދު ޗެކްކޮށް ހުއްދަ ނުނަގާ އަޅާފައިވާ އުޅަނދު ފަހަރުގައި ސްޓިކާ ޖަހާފައިވާ ކަމަށެވެ.

މަސްވެރިންގެ ފައިސާ ނުދީ ހިފަހައްޓާ 2 މަސް ވެފައިވާތީ މަސްވެރިން މިއަދު މިނިވަން އިހުތިޖާޖަކަށް ނުކުމެފައިވާއިރު، ސަރުކާރުން ވަނީ މަސްވެރިންނަށް އުނދަގޫ ޖެއްސެން އޮތް ގޮތަކަށް ޖައްސާފައެވެ. ޚިޔާލު ފާޅު ކުރުމުގެ މިނިވަންކަން ކޮންމެ ފަރުދަކަށް ލިބޭނެ ކަމަށް ރައީސް މުއިއްޒު ވިދާޅުވިނަމަވެސް، މަސްވެރިންނަށް ހައްގު ފައިސާ ހޯދުމަށް ސަރުކާރަށް އާދޭސް ދަންނަވަން ނުކުތުމުން ވަނީ އެ މިނިވަންކަން ވެސް ދިވެހީންގެ ރާއްޖޭގައި ދިވެހިންނަށް ނޯންނާނެކަން ހާމަކޮށްދީފައެވެ.

އަޟްހާ އީދުގެ ކުރިން މަސްވެރިންގެ ފައިސާ ދޫކުރާނެ ކަމަށް މިނިސްޓަރ ޝިޔާމު ވިދާޅުވެފައިވާއިރު، އަދިވެސް ފައިސާ ދޫކުރާނެ ތާރީޚެއް މަސްވެރިންނަށް އަންގާފައިނުވެއެވެ.