ކަނޑުކޮސް ވާހަކައަށް ދިވެހި މަސްވެރިންނެއް ނުހެއްލޭނެކަމަަށް ޕީއެންއެފްގެ ސެކެޓްރީ ޖެނެރަލް މުޙައްމަދު މަލީހު ޖަމާލް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި މަލީހު ވިދާޅުވީ، މި ސަރުކާރަށް ސަސްޕެންޑުކޮށް ގޭގައި ތިބި ވަޒީރުންނަށް ސަބްސިޑީ ދެވޭކަމަށެވެ.
އެހެންނަމަވެސް ނިކަމެތި މަސްވެރިންނަށް އެ ސަބްސިޑީދެވެނީ 3 އަހަރު ފަހުން ކަމަށާއި އެއީވެސް ހަމަ އަގުގައި ކަމަށެވެ. މި ފަދަ ވާހަކަތަކަށް ދިވެހި މަސްވެރިން ނުގުޑާނެ ކަމަށްވެސް މަލީހު ވިދާޅުވިއެވެ.
މި ސަރުކާރު ވެރިކަމަށް އައީ މަސްކިރާތާ ލަސްވެގެން 48 ގަޑިއިރުގެ ތެރޭގައި މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.
އެހެން ނަމަވެސް މަސްވެރިންނަށް ވީ ވައުދުތައް ނުފުއްދި ލަސްވަމުންދަނީ ގައުމުގެ "މާލީ ހާލަތު" ގޯސްކަމުން" ކަމަށް ވަޒީރު އަހުމަދު ޝިޔާމް ވިދާޅުވުމާއެކު މަސްވެރިން އަންނަނީ "ސިޔާސީ މަގާމްތަކުގައި ތިއްބަވާ ފަރާތްތަކަށް" މުސާރާ ދޭން ބަލާއިރު މާލީ ހާލަތު ގޯސް ނޫންތޯ އަހަމުންނެވެ.
މިއީ މަސްވެރިންނަށް ހައްގު ފައިސާއެވެ. ނަމަވެސް ފެނިގެން މިދަނީ ސަރުކާރުގެ ކުރިމަތީގައި މި މަސްވެރިން ދިރިއުޅުމަށް ބޭނުންވާ ޒަރޫރީ ބޭނުންތައް ފުއްދުމަށް ބޭނުންވާ ފައިސާ ދިނުމަށް އެދި އާދޭސް ކުރާ މަންޒަރެވެ.
