އިންޑިއާގެ ގުޖުރާތުގައި ދިވެހި ރާއްޖޭގެ އެހީއާއި އެކު ފެށި ސީޕްލޭނުގެ ދަތުރުތައް ހަރަދު ބޮޑުކަމުން މެދުކަނޑާލައިފިއެވެ.

ގުޖުރާތުގައި މި ހިދުމަތް މެދުކަނޑާލާފައިވަނީ 2021 ވަނަ އަހރުއެވެ.

މިކަމާގުޅޭގޮތުން އެ ގައުމުގެ ނޫސްތަކުން ބުނެފައިވާގޮތުގައި އަހުމަދު އާބާދު ސްޓޭޓު ގާނޫނު ހަދާ މަޖިލީހުގައި މެންބަރަކު ކުރި ސުވާލުގެ ޖަވާބުގައި އެ ސްޓޭޓުން ބުނީ ސީޕްލޭން ހިންގުން ހުއްޓާލާފައިވަނީ އެ ހިދުމަތް ހިންގުމުގެ ހަރަދު މާ ބޮޑުވުމުން ކަމަށެވެ.

އަދި ސީޕްލޭނުގެ ހިދުމަތް ދިނުމަށް އެ ގައުމުން ވަނީ 1.6 މިލިއަން ޑޮލަރު ހަރަދުކޮށްފައިކަމަށްވެސް އެ ގައުމުން ވަނީ ބުނެފައިއެވެ.

ސީޕްލޭނުގެ ދަތުރުތައް ކުރަނީ އިންޑިއާގެ އަހުމަދުއާބާދުގެ ސަބަރުމަތީ ވޯޓާ ފްރަންޓާއި ކެވަޑިއާގެ ސްޓެޗޫ އޮފް ޔުނިޓީއާ ދެމެދުއެވެ.

އަދި މި އެ ސަރަހައްދުގައި ފަށާފައިވަނީ 2020 ވަނަ އަހަރު، ދުވާލަކު 8 ދަތުރުކުރާ ގޮތަށެވެ.

މިއީ މިފަދަ ދަތުރު އިންޑިއާގައި ފުރަތަމަ ފަހަރަށް ކުރެވޭ ދަތުރުކަމުން މި ހިދުމަތް ފައްޓަވާދެއްވީ އެ ގައުމުގެ ބޮޑުވަޒީރު ނަރެންދްރާ މޯދީއެވެ. އަދިއެ ދަތުރުތައް ފެށީ ރާއްޖޭގެ ގައުމީ އެއާލައިން މޯލްޑިވިއަންގެ ޕައިލެޓުންނާއި ފަޅުވެރިން ބޭނުންކޮށްގެންކަން ފަހާގަކޮށްލެވެއެވެ.

ސްޕައިސް ޖެޓާއި ގުޅިގެން ކުރި މި ދަތުރުތަކުގައި ބޭނުންކުރީ 19 ސީޓުގެ ސީޕްލޭނެކެވެ.

މިހާރު މި ދަތުރުތައް ހުއްޓާލާފައި ވީނަމަވެސް ވަރަށް އަވަހަށް މި ދަތުރުތައް އަލުން ފެށުމަށް މަސައްކަތް ކުރަމުން އަންނަ ކަމަށް ގުޖުރާތު ސަރުކާރުން ވަނީ ބުނެފައިއެވެ.

މިފަދަ ސުވާލެއް އުފެދިފައި ވަނީ އިންޑިއާ އާއި ރާއްޖެއާއި މެދު ކުރިމަތިވެފައިވާ މައްސަލަތަކެއްގެ ސަބަބުން ކަމަށް އިންޑިއާގެ ނޫސްތަކުން ދަނީ ބުނަމުންެނެވެ.