އެކެއްގެ ނަމުގައި 100 އުޅަނދު ރެޖިސްޓްރީކޮށްފައިވާކަން ފުލުހުން ހާމަކޮށްފިއެވެ.

ފުލުހުންގެ ސީރިއަސް އެންޑް އޮގަނައިޒްޑް ކްއިރިމް ޑިޕާޓްމެންޓުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ދާއޫދު ވިދާޅުވީ، ރާއްޖޭގެ ރަސްމީ ވައިގެބަނދަރު، ވެލާނާ އިންޓަނޭޝަނަލް އެއާޕޯޓު ހިންގާ ކުންފުނި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިން ޑިރެކްޓަރުގެ ކާރު ވަގަށް ނެގި މައްސަލައެއް ތަހުގީގު ކުރަނިކޮށް ޓްރާންސްޕޯޓު މިނިސްޓްރީގެ ތެރެއިން ހިންގާފައިވާ ވެހިކަލްތަކުގެ ބިޔަ ސްކޭމެއް ފަޅާއަރަފައިވާ ކަމަށެވެ.

އެގޮތުން ފަޅާއެރި ވައްކަމުގެ "ފުންމިން" އަދި ނޭނގޭ ކަމަށާ އެކެއްގެ ނަން މަތީގައި، 100 ވެހިކަލް ރަޖިސްޓްރީކޮށްފައިވާ އިރު، މިހާތަނަށް ބެލިބެލުމުން ވެހިކަލްތަކުގެ އަސްލު ގެއްލޭ ވަރަށް ބަދަލުތައް ގެނެސްފައިވާ ކަމަށް ދާއޫދު ވިދާޅުވިއެވެ.

އޭނާ ވިދާޅުވީ މި ސްކޭމް ފަޅާއެރީ، އެމްއޭސީލްގެ ތެރޭގައި އޮތް ވޭނެއް މިދިޔަ އެޕްރީލް މަހުގެ ތެރޭގައި ވަގަށް ނެގި މައްސަލައިގެ ތަހުގީގަށް ބެލި ބެލުމުން ކަމަށާއި އެ ވޭން ވަގަށް ނެގުމުގައި އެ ކުންފުނީގެ މުވައްޒަފެއް ހަރަކާތްތެރިވެފައިވާ ކަމަށެވެ.

އޭނާ ވިދާޅުވި ގޮތުގައި، ވެހިކަލް ވަގަށް ނެގުމަށް ފަހު ނަމްބަރު ޕްލޭޓް ވެސް ބަދަލުކޮށް، ވެހިކަލްގެ އަސްލު ވަނީ އޮޅުވާލައިފައި ކަމަށެވެ. އެކަންކުރީ ވެހިކަލް ވަގަށް ނަގައިގެން އެ ރޭގެ ދަންވަރު އެއާޕޯޓު ހުޅަނގުން އޮންނަ މަގުން ހުޅުމާލެ ގޮސް، ހުޅުމާލޭ އޮރެންޖު ބިލްޑިން ކައިރީގައި ކަމަށް ވެސް ފުލުހުން ބުންޏެވެ.

އެ ވެހިކަލް މާލެ ގެނައުމަށް ފަހު ބާއްވާފައި ވަނީ ހ. އީރާނުގޭގައެވެ. ފުލުހުން ބުނީ މި މައްސަލާގައި މިހާތަނަށް ދެ މީހަކު ހައްޔަރުކޮށްފައިވާ ކަމަށެވެ. އެއީ، އެމްއޭސީއެލްގެ ސްޓާފެއް ކަމަށްވާ މ. ސީނި އަސުރުމާގެ އަހުމަދު ހައިޝަމް، 42 އާއި މ. މޮޑަން ހޯމް އަހުމަދު ނިޒާމް، 43 އެވެ.

ދާއޫދު ވިދާޅުވީ ފުލުހުން ހޯދަނިކޮށް އެ ވެހިކަލް ފެނުނީ އީރާނުގެ ތިރީގައި ހަދާފައި ހުރި ގަރާޖެއްގެ ތެރެއިން ކަމަށެވެ. އެ ގަރާޖު ބަލައި ފާސްކުރިއިރު އެ ވޭންގެ އިތުރުން އޭގެ މަހެއްހާ ދުވަސް ކުރިން އިމިގްރޭޝަނުން ވަގަށް ނަގާފައިވާ ވެހިކަލެއް ވެސް ފެނިފައިވާ ކަމަށް އޭނާ ވިދާޅުވިއެވެ.

މި މައްސަލައިގައި ތުހުމަތުކުރެވެނީ ދެ ފިރިހެނުންނަށްކަމަށްވާއިރު އެކަކަކީ އެމްއޭސީއެލްގައި މަސައްކަތްކުރަމުންދިޔަ މުއައްޒަފެއްކަމަށްވެސް ފުލުހުން ބުނެފައިވާއިރު، ދާއޫދު ވަނީ މި މައްސަލައިގައި ކުރި ތަހުގީގުތަކުގެ ތެރެއިން އެ މީހުންގެ ނަންމަތީގައި ތިބި އުޅަނދުތަކުގެ އަދަދު ބެލިކަން މީޑިއާތަކަށް ކަށަވަރުކޮށްދީފައެވެ. ދާއޫދު ވިދާޅުވީ ގަރާރު ހިންގަމުންދިޔަ މީހާގެ ނަން މަތީގައި ޖުމަލަ 100 އުޅަނދު ހުރިކަމަށެވެ. އަދި އެތަނުން 86 އުޅަނދަކީ ހަތަރު ފުރޮޅުލީ ތަކެތިކަމަށް ބުނެފައިވެއެވެ.

އޭނާ ވިދާޅުވީ، 86 އުޅަނދުގެ ތެރެއިން 42 އުޅަނދެއް ހުރީ ތުހުމަތުކުރެވޭ އެކަކުގެ އަނބިމީހާގެ ނަންމަތީގައިކަމަށެވެ. އަދި ބާކީ އުޅަނދުތައް އޭނާގެ ނަންމަތީގައި ރަޖިސްޓްރީކޮށްފައިވާކަމަށް ބުނެފައިވާއިރު މި މައްސަލަ މިހާރު ޕީޖީ އޮފީހަށް ފޮނުވާފައިވާކަމަށާއި އެހެންނަމަވެސް އެކަކުގެ މައްސަލައިގައި ތަހުގީގުތައް ކުރިއަށްދާކަމަށްވެސް ބުނެފައިވެއެވެ.

މީގެ ތެރެއިން ބައެއް ވެހިކަލްތައް ހުރީ ކުރިއަށް އޮތް ތިން އަހަރުގެ ތާރީހުތަކަށް ރަޖިސްޓްރީކޮށްފައިވާ ކަމަށްވެސް ދާއޫދު ވިދާޅުވިއެވެ.

ދާއޫދު ވިދާޅުވީ މިކަން ހިނގާފައި އޮތީ ނިޒާމް އާ ގާތް ގުޅުމެއް އޮންނަ ގޮތުން، ޓްރާންސްޕޯޓު މިނިސްޓްރީއާ ގުޅިގެން ވަރަށް ބޮޑަށް ރޭވިގެން ކަމަށެވެ. ވައްކަމުގެ މައްސަލައާއެކު ޓްރާންސްޕޯޓު ތެރެއިން މި ޖަރީމާ ހިންގުމުގެ ތެރޭގައި ހިމެނޭ ބަޔަކު ހޯދުމުގެ މަސައްކަތް ވެސް ކުރަމުން އަންނަ ކަމަށް އޭނާ ވިދާޅުވިއެވެ.