ދައުލަތުގެ މީޑިޔާ "ޕީއެސްއެމް" އިން ރައްޔިތުންގެ ފައިސާ ނަހަމަގޮތުގައި ބޭނުންކޮށްގެން "ޔޫރޯ 2024" ދައްކާތީ އެއީ ރަނގަޅު ކަމެއްގެ ގޮތުގައި ސަސްޕެންޝަންގައި ހުންނެވި ޔޫތް މިނިސްޓްރީގެ ޑެޕިޔުޓީ މިނިސްޓާރ މަރިޔަމް ޝިއުނާ ސިފަކޮށްފިއެވެ.
ޝިއުނާ ވަނީ "ތޭރަ އޮންލައިން" އިން ޝާއިއު ކޮށްފައިވާ ރިޕޯޓް އެކްސްގައި ޝެއާރ ކުރެއްވުމަށްފަހު ޔޫރޯ ނުދައްކައިފިނަމަ އެކަމާ ތޭރަ އޮންލައިން ކަންބޮޑުވާނެކަމަށް ބުނެފައެވެ.
ޝިއުނާ މިފަދައިން ވިދާޅުވި ނަމަވެސް މިފަދަ ތަރައްގީވެފައިވާ ޒަމާނެއްގައި ރާއްޖޭގެ ރައްޔިތުންނަށް "ޕީއެސްއެމް" އިން ޔޫރޯ 2024 ނުދެއްކި ކަމުގައިވީނަމަވެސް ޔޫރޯ ބެލޭނެ ބައިވަރުގޮތްތައް ހުރެއެވެ.
ރާއްޖޭގެ އިގްތިޞާދީ ހާލަތު އަނދަވަޅެއްގައި އޮއްވާ ޝިއުނާ އަށް މުހިންމީ ޔޫރޯ ބެލުންކަން ޝިއުނާގެ ޕޯސްޓުން ވަނީ ދޭހަވެފައެވެ.
ޝިއުނާ އެއްވެސް މަސައްކަތެއް ނުކޮށް ސަސްޕެންޝަންގައި ހުންނަވާ ބޮޑު މުސާރަ ނަގަމުންދާކަން ފާހަގަކޮށްލެވެއެވެ.
އެހެންކަމުން އާންމު ރައްޔިތުން ބުރަ މަސައްކަތް ކޮށްގެން ހޯދާ ފައިސާ ސަރުކާރުން ނަހަމަ ގޮތުގައި ބޭނުން ކުރުމުން ޝިއުނާ އަށް އެއީ އެހާބޮޑުކަމެއް ނޫނެވެ.
ސަސްޕެންޝަންގައި ހުންނަވާ ޝިއުނާ ގެންދަނީ ސޯޝަލް މީޑިޔާގައި އެކި އެކި ފަރާތްތަކަށް ފުރައްސާރަކުރަމުންނެވެ.
ޕީއެސްއެމް އިން ޔޫރޯ ދެއްކުމުގެ ނަމުގައި ބޮޑު ޖަރީމާއެއް ހިންގާކަމަށް "ތޭރަ އޮންލައިން" އަށް އިތުބާރު ހުރި މަސްދަރަކުން މައުލޫމާތު ލިބިފައިވެއެވެ.
