އިޒްރޭލް ޕާސްޕޯޓް މަނާކުރުމާއި ދެކޮޅަށް މާމިގިލި ދާއިރާގެ މެންބަރު ގާސިމް އިބްރާހީމް ވާހަކަ ދެއްކެވެމުން ގާސިމްގެ ވިޔަފާރިތައް ކަމަށްވާ ވިލާ ބްރޭންޑް ބޮއިކޮޓް ކުރުމަށް ދިވެހިން ގޮވާލައިފިއެވެ.

އަމީނީ މަގު ޕިއްޒާ ހަޓް ކުރިމަތީ ރޭ ކުރިއަށް ގެންގޮސްފައިވާ އެއްވުމެއްގައި ސިޔާސީ މަންފާއަށް އަމިއްލަ އެދުން އިސްކޮށް ފަލަސްތީނުގެ މުސްލިމުންގެ ހައްގުތައް އެއްފަރާތްކޮށް ވާހަކަދައްކާ ފަރާތްތަކަށް ރާއްޖޭގައި ޖާގައެއް ނެތް ކަމަށް މި އެއްވުމުގައި ގޮވާލާފައިވެއެވެ. ވިލާ ކުންފުނީގެ ވިޔަފާރިތައް ބޮއިކޮޓް ކުރުމަށް ގޮވާލާ ބޯޑުތަކެއް ހިފައިގެން މި އެއްވުމުގެ ބައިވެރިން ހަރަކާތްތެރިވެފައިވެއެވެ.

މީގެ އިތުރުން، ޝެއިޚް އަހްމަދު ނިޝާން ވަނީ މި އެއްވުމުގައި ބައިވެރިވެ ޔަހޫދީން އަށް ވާގިވެރިވާ ވިޔަފާރިތައް ބޮއިކޮޓް ކޮށް އިޒްރޭލާއި ރައްޓެހިކަން ބާއްވާ ފަރާތްތަކާއި ގުޅުން ކަނޑާލުމަށް ގޮވާލާފައެވެ.

ގާސިމްގެ އިތުރުން ސަރުކާރުގެ ބައެއް އިސްވެރިންވެސް އަންނަނީ އިޒްރޭލުގެ ޕާސްޕޯޓް މަނާކުރުމާއި ދެކޮޅު ހަދަމުންކަން ފާހަގަކުރެވިފައިވެއެވެ.