މަޖިލިސް ރައީސް އަބްދުއްރަހީމް އަބްދުﷲ (އަދުރޭ)ގެ ދަރިކަނބަލުންގެ، ފިރިމީހާގެ ބައްޕަ، އަދި އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް (ޖުހާ) އެ ކުންފުނީގެ ކާޑުން ތައިލޭންޑުން ބޭސްފަރުވާއަށް ހޭދަކުރިކަން ފަޅާއަރައިފިއެވެ.
މިކަން ހާމަކޮށްފައި ވަނީ ހަސަން ކުރުސީގެ އެކްސްގައިއެވެ. އެ ޕޯސްޓުގައި ވަނީ މި ކާޑު ބޭނުންކޮށްގެން ޚަރަދުކޮށްފައިވާ ތަންތަނުގެ ނަމާ ތަފްސީލުވެސް ހާމަކޮށްފައިއެވެ.
އެގޮތުން އެ ކާޑު ބޭނުންކޮށްގެން ވަނީ ތައިލެންޑްގެ ހޮސްޕިޓަލުތަކުން ބޭސްފަރުވާގެ ޚިދުމަތް ލިބިގަނެމ އަގު ބޮޑެތި ބްރޭންޑުތަކުގެ ފިހާރަތަކުން ވިޔަފާރިވެސް ކޮށްފައެވެ.
މި މައުލޫމާތު ކުރުސީއަށް ފޯރުކޮށްދީފައި ވަނީ ބޭންކޮ އޮފް މޯލްޑިވްސްގެ މުވައްޒަފެއް ކަމަށާއި މައުލޫމާތު ހިއްސާކޮށްފައި ވަނީ ފައިސާ ޚަރަދު ކުރުމުގައި ކޮރަޕްޝަން އެކުލެވޭކަމަށް އެ މުވައްޒަފު ތުހުމަތުކުރާތީ ކަމަށްވެސް ކުރުސީ ވަނީ ބުނެފައިއެވެ.
މި ޕޯސްޓުގައި އިތުރަށް ބުނެފައި ވަނީ މިއީ އެ ކުންފުންޏަށް ވެސް ވެވުނު ޚިޔާނާތެއް ކަމަށެވެ. އަދި މި ފައިސާ އަނބުރާދެއްކި ކަމުގައި ވީނަމަވެސް މިއީ ކޯރްޕޮރަޓެ ގޮވެރްނަންސް ކޯޑު، ފިނަންޝަލް ރެގިއުލޭޝަންސް، އެމްޕީއެލްގެ ފިނޭންސް ޕޮލިސީ އަދި، ޕްރޮކިއުމެންޓު ޕޮލިސީއާއި ޚިލާފުވުން ކަމަށް ކުރުސީ ވަނީ ފާހަގަކޮށްފައިއެވެ.
މިކަން އެމްޕީއެލްއިންވެސް ތެދު ކޮށްފައިވާއިރު މި މަގާމުން ވަޖީހު ވަކި ކުރަން އެ ޕޯސްޓުގައި ވަނީ ގޮވާލާފައިއެވެ.
