

ރައީސް ޑރ. މުހައްމަދު މުއިއްޒު ޕީޕަލްސް ނޭޝަނަލް ކޮންގްރެސް ޕީއެންސީގެ މާހެފުމުގައި ބައިވެރިވެ ވަޑައިނުގަންނަވާކަމަށް ހާމަވެއްޖެއެވެ.
މައުލޫމާތު ލިބޭ ގޮތުގައި ރައީސް މުއިއްޒު ޕީއެންސީ މާހެފުމަށް ވަޑައިނުގެންނެވަން ނިންމެވި ސަބަބަކީ މަޖިލީހުގެ ރައީސް އަބްދުއްރަހީމް އަބްދުﷲ އެ ހަރަކާތުގައި ބައިވެރިވެވަޑައިގަންނަވާތީއެވެ.
ޕީއެންސީ މާހެފުމުގައި އެ ޕާޓީގެ ލީޑަރޝިޕްގެ އިތުރުން ސަރުކާރުގެ ވަޒީރުންނާއި މަޖިލިސް މެންބަރުން ބައިވެރިވެވަޑައިގަންނަވާނެ ކަމަށް ޕާޓީން އިއުލާންކޮށްފައިވެއެވެ.
ރައީސް މުއިއްޒު ޕީއެންސީ މާހެފުމުގައި ބައިވެރިވަޑައިނުގަންކަން ހާމަވިއިރު އަބްދުއްރަހީމާއި ދެމެދު ވަރަށް ގުޅުން ގޯސްވެ ދެ ބޭފުޅުންގެ ދެމެދުގައި މަޝްވަރާތައްވެސް ހުއްޓާލާފައިވާ ކަމަށް ބެލެވޭ ދަނޑިވަޅެއްގައެވެ.
އަބްދުއްރަހީމާ ރައީސް މުއިއްޒާ ގުޅުން އެންމެ ގޯސްވެގެން ގޮސްފައިވަނީ އަބްދުއްރަހީމުގެ ދަރިފުޅު އިބްރާހިމު ފައިސަލް ޓޫރިޒަމް މިނިސްޓަރުކަމުން ވަކިކުރި ހިސާބުންނެވެ.
އެދުވަހި އަބްދުއްރަހީމު މެލޭޝިއާގައި ހުންނަވާ ރާއްޖޭގެ މީޑިޔާއަކަށް ދެއްވި އިންޓަވިއުގައި ވިދާޅުވީ ކުރިން އޮތް ގާތް ގުޅުން އެ ދެމެދުގައި އޮތްނަމަ ފައިސަލް ވަކިކުރުމުގެ ކުރިން މަޝްވަރާއެއް ވެސް ރައީސް މުއިއްޒު ކުރެއްވެވީސް ކަމަށެވެ.
ރައީސް މުއިއްޒު ވަނީ ޕީއެންސީ ހިންގުމުގެ ބާރުތައްވެސް އަބްދުއްރަހީމު އަތުން ނަގާ ޕާޓީއިން ވެސް އެއް ފަރާތްކުރުމަށް މަސައްކަތް ކޮށްފައެވެ.
އެގޮތުން ޗެއަރ ޕާސަން އަށް ކަނޑައަޅުއްވާފައި ހުންނަ ކެބިންގެ ތަޅު ބަދަލު ކުރިކަން ފާހަގަކޮށްލެވެއެވެ.
ރައީސް މުއިއްޒު ޕީއެންސީ މާހެފުމުގައި ބައިވެރިވަޑައިނުގަންނަވާ އިރު އަބްދުއްރަހީމް ރައީސް މުއިއްޒުގެ މައްޗަށް ކުރި ހޯދައްވާފިކަމުގެ އަޑުތައްވަނީ ފެތުރެން ފަށާފައެވެ.