ރައީސް ޑރ. މުހައްމަދު މުއިއްޒުގެ ސަރުކާރުން ސިޔާސީ މަގާމުތަކަށް އައްޔަންކޮށް ވަޒީފާގެ ސިޓީ ދިނުމަށްފަހު ވެސް އަދި ވަޒީފާއަށް ނުނެރެ 8000 މީހުން އެބަތިބި ކަމަށް ހެންވޭރު ދެކުނު ދާއިރާގެ ކުރީގެ މަޖިލިސް މެމްބަރު ހުސައިން ޝަހީމް ވިދާޅުވެއްޖެއެވެ.

ސަންގުޓީވީގެ ހަބަރަށްފަހު ޕްރޮގްރާމްގައި ވާހަކަދައްކަވަމުން ޝަހީމް ވިދާޅުވީ ރާއްޖޭގެ ތާރީހުގައި ވެސް ފުރަތަމަ ފަހަރަށް ވަޒީފާގެ ލިޔުން ދިނުމަށްފަހު މަސައްކަތްކުރަން ނުނެރެ މުވައްޒަފުން ގޭގައި ބައިތިއްބާފައިވާ ތިބި ކަމަށެވެ.

އެގޮތުން 12800 މީހަކަށް ވަޒީފާ ދޭނެކަމުގެ ލިޔުން ދީފައިވާއިރު އޭގެ ތެރެއިން 8000 މީހުން އަދިވެސް ތިބީ ގޭގައި ކަމަށް ޝަހީމު ވިދާޅުވެފައިވެއެވެ. ރައްޔިތުންދަނީ ހެއްކާއިއެކު މިވަހަކަތައް ދައްކަމުން ކަމަށާ މުސާރަ ހިނގާނީ ވަޒީފާއަށް ނުކުންނަ ދުވަހުން ފެށިގެންކަމަށް ލިޔުންތަކުގައި ބަޔާންކޮށްފައިވާކަމަށް ވެސް ޝަހީމްގެ ވާހަކައިގައި ފާހަގަކުރެއްވިއެވެ.

ޝަހީމް ވިދާޅުވީ މި ވަޒީފާތަކުގެ މުސާރަތައް ހުރީ 18000 އަދި 25000 ފަދަ އަދަދުތަކުގައިކަމަށެވެ. އަދި ރައީސް މުއިއްޒުގެ ސަރުކާރުންވަނީ ދައުލަތް ލޫޓުވާލާފައިކަމަށް އޭނާ ތުހުމަތުކުރެއްވިއިރު ހިންގަމުންދާ ނޭދެވޭ އަމަލުތަކުގެ އަސަރުތައް ރައްޔިތުންނާއި ހިސާބަށް ފޯރާނެކަމަށްވެސް ޝަހީމް ވިދާޅުވިއެވެ.

މީގެ އިތުރުން ވެސް ޝަހީމު ވަނީ ބޮޑޫ ތުހުމަތެއް މި ސަރުކަރަށް އަމާޒުކޮށްފައެވެ.

އެގޮތުން ޝަހީމް ވިދާޅުވީ ރާއްޖޭގެ ތާރީހުގައި މިހާތަނަށް އެންމެ ގިނައިން ސިހުރު ހާހޫރަ ހެދިކަމަށް ރައްޔިތުން ތުހުމަތުކުރާ  ސަރުކާރަކީ ރައީސް ޑރ މުހައްމަދު މުއިއްޒުގެ ސަރުކާރުކަމަށާއި ހޯދިތަނަކުން ހޯދައިގެން އެންމެ ގިނަ އަދަދަކަށް ފައިސާ ދާއިރާތަކަށް އިންތިހާބުތަކާ ދިމާކޮށް ބެހި ސަރުކާރަކީވެސް ރައީސް މުއިއްޒުގެ ސަރުކާރުކަމަށެވެ.