ލޮރީ ޓްރަކެއް ގައި ގިނަ އަދަދެއްގެ ބިދޭސީން އުފުލި މައްސަލަ ބަލަމުންދާ ކަމަށް ފުލުހުން ބުނެފި އެވެ.
ރާއްޖޭގައި މަސައްކަތް ކުރާ ބިދޭސީންތަކެއް ލޮރީ ޓްރަކެއް ގައި އުފުލާ މަންޒަރު ފެންނަ ވީޑިއޯއެއް ވަނީ އާންމުވެފަ އެވެ.
އެ ލޮރީގައި ވަރަށް ގިނަ އަދަދެއްގެ ބިދޭސީން ތިބޭތަން ފެނެ އެވެ.
އެ މީހުން ހުޅުމާލެ އިން މާލެއަށް ދަތުރުކުރުމަށް ފަހު ލޮރީން ފައިބާ މަންޒަރު ވެސް ފެނެ އެވެ.
ގާތްގަނޑަކަށް ތިރީހަކަށް މީހުން ލޮރީން ފައިބައެވެ.
އެ ވީޑިއޯ ވައިރަލްވުމުން އެއީ ވެސް އިންސާނުންނާމެދު އަމަލު ކުރެވޭނެ ގޮތްތޯ ގިނަ ބަޔަކު ސުވާލުކޮށްފައިވެ އެވެ.
އަދި ޖަނަވާރުން އުފުލާ އުސޫލުން އިންސާނުން އުފުލާން ފެށުމަކީ ރާއްޖޭގައި ބިދޭސީންނާމެދު އަމަލު ކުރެވޭ ގޮތާމެދު ސުވާލު އުފެދޭ ކަމެއް ކަމަށް ބުނެފައިވެ އެވެ.
ފުލުހުންގެ ތަރުޖަމާން އަހްމަދު ޝިފާން ވަނީ އެއީ ގާނޫނީ ގޮތުން މަނާ ކަމެއްކަން ފާހަގަ ކޮށް އެފަދަ ކަންކަން ބަލާނެ ކަމަށް ވިދާޅުވެފައެވެ.
