ޕަބްލިކު ސާވިސް މީޑިޔާ ޕީއެސްއެމުން އެ ކުންފުނީގެ ޕްރޮކިއުމަންޓު އުސޫލާ ޚިލާފަށް ކުރުވާފައި ހުރި މަސައްކަތްތަކަށް 1 މިލިއަނަށް ވުރެ ގިނަ ރުފިޔާ މިހާރުގެ އެމްޑީ ޒީނާ ޒާހިރު ދޫކޮށްފިއެވެ.

މައުލޫމާތު ލިބިފައިވާ ގޮތުގައި ޒީނާގެ އެމްޑީކަމުގައި މި ފައިސާ ދޫކުރިއިރު، ކުރީގެ ރައީސް އިބްރާޙިމު މުހައްމަދު ސޯލިހުގެ ސަރުކާރުގެ ޕީއެސްއެމް ބޯޑުން ވަނީ ކޯޓުގެ ހުރިހާ މަރުހަލާއެއް ނިމުމުގެ ކުރިން އެ ފައިސާ ދޫނުކުރަން ނިންމާފައިއެވެ.

ނަމަވެސް ޒީނާ އެމްޑީ ކަމާ ހަވާލުވެ ކޯޓު މަރުހަލާގައި އޮތް މައްސަލައާ ގުޅުން ހުރި މި ފައިސާ ދޫކޮށްފައިވާއިރު ފައިސާ ލިބުނު މީހުންގެ ތެރޭގައި ޒީނާއާ އާއިލީ ގޮތުން ގުޅުން ހުރި ބައްޕަ ފަރާތުގެ އާއިލީ މީހެއް ކަމަށާ، މަޝްހޫރު ކޮމެންޓޭޓަރ އަބްދުﷲ އަޒްމީންވެސް ހިމެނެއެވެ.

މެއި މަހާ ޖޫން މަހުގެ ތެރޭގައި ދޫކުރި އެ ފައިސާގެ ޖުމްލަ އަދަދު 1،153،992ރ (އެއް މިލިއަން އެއް ލައްކަ ފަންސާސް ތިން ހާސް ނުވަ ސަތޭކަ ނުވަދިހަ ދެ ރުފިޔާ) އަށް އަރައެވެ. އޭގެ ތެރެއިން އަޒްމީނަށް ދޫކޮށްފައިވަނީ 40،000 ރުފިޔާއެވެ. ބާކީ 1،113،992ރ ( އެއް މިލިއަން އެއް ލައްކަ ތޭރަ ހާސް ނުވަ ސަތޭކަ ނުވަދިހަ ދެ ރުފިޔާ) ދޫކޮށްފައިވަނީ ޖޭއެމްޖޭ އިންވެސްޓްމަންޓަށެވެ. އެ ކުންފުނިން ވަނީ ޕީއެސްއެމްގެ އެކި އެކި މަރާމާތުގެ މަސައްކަތްކޮށްފައެވެ.

އެގޮތުން ޖޭއެމްޖޭއަށް ދޫކުރި 1.1 މިލިއަން ރުފިޔާގެ ތެރެއިން ހަތަރު ލައްކަ ރުފިޔާ ފޮނުވާފައި އޮތީ އެ ކުންފުނީގެ ވެރިޔާ ޔާސިރާ ޔޫސުފްގެ އެކައުންޓަށެވެ. އަޒްމީނަށް ދޫކުރި ފައިސާއަކީ ވޯލްޑް ކަޕް 2018 އަށް މެގަޒިނެއް ތައްޔާރު ކުރުމަށްފަހު ދޭންޖެހޭ ފައިސާ އެވެ.

ހުރިހާ މަސައްކަތެއް ޕީއެސްއެމްއިން ކުރުވާފައި ވަނީ އެ ކުންފުނީގެ ޕްރޮކިއުމެންޓް އުސޫލާ ހިލާފަށްކަން ވަނީ ހާމަވެފައެވެ. މަސައްކަތް ހަވާލު ކުރިކަމުގެ އަދި ނިންމިކަމުގެ ލިޔެކިޔުމެއް ވެސް ޕީއެސްއެމްއަކު ނެތެވެ. ނަމަވެސް އަޒްމީންގެ މައްސަލަ ފޫބެއްދުމަށް ފައިސާ ދޫކުރުމުގެ ކުޑަ ދުވަސްކޮޅެއް ކުރިން އޭނާ އެ މަސައްކަތް ކުރި ކަމުގެ ލިޔުމެއް ޕީއެސްއެމް މާކެޓިން ޑިޕާޓްމަންޓުން ފައިނޭންސް ޑިޕާޓްމަންޓަށް ފޮނުވަފައިވާ ކަމަށް މައުލޫމަތު ލިބިފައިވެއެވެ.

ޕީއެސްއެމް ބޯޑުގެ މެމްބަރަކު ނަން ހާމަނުކުރުމަށް އެދި ތޭރަ އޮންލައިނަށް މައުލޫމާތު ދެއްވާފައިވާ ގޮތުގައި ޒީނާ މިފަދަ ކޮރަޕްޝަނަށް މަގު ފަހިވާ ފަދަ އަމަލެއް ހިންގަން މަސައްކަތް ފެށުމުން އެ ކުންފުނީގެ ފައިނޭންސް ހެޑު އަހުމަދު ހަނީފް އެކަމާ ދެކޮޅު ހެދުމުން ޒީނާވަނީ ހަނީފު އެ ކުންފުނީގެ ވަޒީފައިން ވަކިކޮށްފައެވެ.

މިހާ ގިނަ ފައިސާ އެއް ފަހަރާ ޕީއެސްއެމުން ވަކި ބަޔަކަށް ދޫކޮށްފައިވާ އިރު މީގެ ކުރިން އެމްޑީ ޒީނާ ވިދާޅުވެފައިވާ ގޮތުގައި އެ ކުންފުނި އޮތީ ދަރަނީގައެވެ. އަދި އޭނާ އެމްޑީ ކަމާ ހަވާލުވިއިރު ކުންފުނީގެ ތިޛުރީގައި އޮތީ އެންމެ ހަތް ރުފިޔާ ކަމަށެވެ. އެހެންކަމުން އެވަރުގެ ދަރަންޏެއް އޮތް ކުންފުންޏަކުން މިހާ ބޮޑު އަދަދެއް ހޮދި ގޮތާ މެދު ގިނަ ބަޔަކު ގެންދަނީ ސުވާލު އުފައްދަމުންނެވެ.