ދިރާގު "ވިން އަ ޓެސްލާ" ޕްރޮމޯޝަންގެ ނަސީބުވެރި ފަރާތް ހޮވައިފިއެވެ.
ދިރާގުގެ 35 ވަނަ އަހަރީ ދުވަސް ފާހަގަކުރުމުގެ ގޮތުން ފެށި ޕްރޮމޯޝަނެކެވެ. ޕްރޮމޯޝަންގައި ބައިވެރިވުމުގެ ފުރުސަތި ހުޅުވާލީ ދިރާގު ޕޯސްޓްޕެއިޑް 450 އަދި ފައިބަރ ބްރޯޑްބޭންޑް 30M އިން މަތީގެ ޕެކޭޖްއަކަށް ސަބްސްކްރައިބް ކުރާ ކަސްޓަމަރުންނަށެވެ.
ޕްރޮމޯޝަންގެ ލަކީ ޑްރޯއިން ޓެސްލާ ކާރު ލިބުނީ މުސްތަފާ މުޙައްމަދަށެވެ. ކަސްޓަމްސްގައި ވަޒީފާ އަދާކުރަމުްނ އަންނަ ކ. ތުލުސްދޫއަށް އުފަން މުސްތަފާ ބުނެފައިވާ ގޮތުގައި އޭނާއަށް ކަރު ލިބުނުކަން ގަބޫލުކުރަން އުނދަގޫވި ކަމަށާ ނަމަވެސް ދިރާގުން ވައިބަރ މެދުވެރިކޮށް މެސެޖުކުރުމުން އެކަން ގަބޫލުކޮށް ﷲ އަށް ޝުކުރުގެ ސަޖިދަ ޖެހި ކަމަށެވެ.
މުސްތަފާއަކީ ކާރު ދުއްވުމުގެ ލައިސަންސްވެސް ނޯންނަ މީހަކަށްވައިރު އޭނާ ބުނެފައިވާ ގޮތުގައި އަދި އެކާރާ މެދު އޭނާ ކަންކުރާނެ ގޮތެއް ނުވިސްނާ ކަމަށެވެ.
"ވިން އަ ޓެސްލާ"ގެ ނަސިބުވެރި ފަރާތް ހޮވާފައިވަނީ އަޟްޙާ އީދާ ދިމާކޮށް ދިރާގުން ހުޅުމާލެ ސެންޓްރަލް ޕާކްގައި ބޭއްވި ދިރާގު އީދު ޝޯގެ ތެރެއިންނެވެ.
ދިރާގުން ބުނީ މި ޕްރޮމޯޝަންގެ ކަންތައްތައް އިންސާފުވެރިކޮށް އަދި ދެފުށްފެންނަ ގޮތަކަށް ކުރިއަށްގެންދިޔުމަށްޓަކައި މިނިވަން އޮޑިޓަރެއް ކަމުގައިވާ ކްރޯ މޯލްޑިވްސްއާއި ގުޅިގެން މަސައްކަތްކޮށްފައިވާކަމަށެވެ
