މިދިޔަ ބުރާސްފަތި ދުވަހު ހާލުދެރަވެގެން މާލެ ނުގެެނެވި ލަސްވި ކުޑަކުއްޖާ މާލެ ގެނެސް ހޮސްޕިޓަލުގައި ފަރުވާދެމުން ދަނިކޮށް ނިޔާވުމާއި ގުޅިގެން އެ ކުއްޖާ ނިޔާވީ ސަރުކާރުގެ އިހުމާލުން ކަމަށް ބުނެ އާންމުން އިހްތިޖާޖްކޮށްފިއެވެ.

ޗެނަލް 13 އަށް މައުލޫމާތު ލިބިފައިވާގޮތުގައި ނިޔާވި ކުޑަކުއްޖާ މާލެ ގެނެވުނީ ހާލުދެރަވެ، މާލެ ގެނައުމަށް އެދިފައިވާތާ 16 ގަޑިއިރު ފަހުންނެވެ.

ބައެއް ނޫސްތަކުން ރިޕޯޓްކޮށްފައިވާ ގޮތުން މާލެ ގެނެސް އެ ކުއްޖާއަށް ފަރުވާދިނީ އައިސީޔޫގައި ބާއްވައިގެންނެވެ. އަދި އެއިރު އެ ކުއްޖާ އޮތީ ކޯމާއެއްގައި ކަމަށް ވެސް މައުލޫމާތު ދިން ފަރާތްތަކުން ބުނެފައިވެއެވެ.

މައުލޫމާތު ލިބިފައިވާ ގޮތުގައި މާލެ ގެނެސް ފުރަތަމަ އޭނާ އަށް ފަރުވާދީފައިވަނީ އައިޖީއެމްއެޗްގައެވެ.

މިކަމާގުޅޭގޮތުން އާދިއްތަ ދުވަހު ރައްޔިތުންގެ މަޖިލިސް ކުރިމައްޗައް އެއްވެ، އިހްތިޖާޖްކުރި ރައްޔިތުން ވަނީ ސަރުކާރުން ޑޯނިޔާ ބޭނުން ނުކުރުމުން އެކަމާމެދު ސަރުކާރަށް ފާޑުކިޔުން އަމާޒުކޮށް ޖަވާބުދާރީ ވުމަށް ގޮވާލާފައިއެވެ.

މި ކުއްޖާގެ މަރާއި ގުޅިގެން އެގޮތުން އާސަންދައިން ބުނީ 18 ޖެނުއަރީ 2024 ވަނަ ދުވަހުގެ ފަތިހު 05:03 ގައި އާސަންދައަށް އިމަޖެންސީ އިވެކުއޭޝަން ( އީއީވީ ) ގައި ގއ. ވިލިނގިލި އަތޮޅު ހޮސްޕިޓަލުން އިންދިރާ ގާންދީ މެމޯރިއަލް ހޮސްޕިޓަލަށް ބަލި މީހާ ބަދަލުކުރުމަށް އެދިފައިވާކަމަށެވެ. އަދި ހަމައެހެންމެ މެޑިކަލް ސެކްޝަނުން 12 މިނެޓުގެ ތެރޭގައި މައްސަލަ ޕްރޮސެސްކޮށް އެޕްރޫވްކޮށްފައިވާ ކަމަށްވެސް ވަނީ ވިދާޅުވެފައެވެ.

ނަމަވެސް އެ ކުއްޖާ މާލެ ގެނައުން ލަސްވުމުގެ ސަބަބުން ބޭނުންވާ ފަރުވާ ނުލިބި އެކުއްޖާ ވަނީ ހޮނިހިރު ދުވަހު ނިޔާވެފައިއެވެ.

މި މައްސަލަ މިހާރު ދަނީ މަޖިލީހުގެ ޖެންޑާ އެންޑު ހިއުމަން ރައިޓުސް ކޮމިޝަނުން ބަލަމުންނެވެ.