ރާއްޖޭގެ ވެރިރަށް މާލޭގައި ކުށް ގިނަވެފައިވަނީ ކުރީ ސަރުކާރުން ވައްކަމުގެ ބޮޑުންތަކެއް ދޫކޮށްލާފައިވާތީ ކަމަށް ފުލުހުންގެ ތަރުޖަމާނު އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން ވިދާޅުވެއްޖެއެވެ.

ރާއްޖޭގެ އޮންލައިން ނޫހެއް ކަމަށްވާ، "އަދަދު"ގައި ޝާއިއުކޮށްފައިވަ ރިޕޯޓެއް ހިއްސާކުރައްވާ ޝިފާން ނޫސްވެރިންގެ ވަޓްސް އަޕް ގްރޫޕުގައި ވިދާޅުވީ، ރާއްޖޭގެ ވެރިރަށް މާލޭގައި ކުށް ގިނަ ވުމަކީ ހަގީގަތެއް ކަމަށާއި އެކަން ހުއްޓުވަން ފުލުހުންނަށް ގޮންޖެހުންތަކެއް ވެސް ހުރި ކަމަށެވެ.

އެގޮތުން ޝިފަން ހާމަކުރައްވާފައިވާ ގޮތުގައި މާލޭގައި ކުށްކުރުން އިތުރުވެފައި ވަނީ ކުށްވެރިންގެ ގިނަ ބަޔަކު އެއްވެސް ހަމައެއް ނެތި މުޖުތަމައުއަށް ދޫކޮށްލާފައިވާތީ ކަމަށެވެ. ޝިފާން އިތުރަށް ވިދާޅުވީ، މީގެ 10 ވަރަކަށް މަސް ދުވަސް ކުރިން 434 ކުށްވެރިން މުޖުތަމައަށް ދޫކޮށްލާފައިވުން ކަމަށާއި އެ މީހުން ދޫކުރީ މޮނިޓާކުރެވޭނެ ހަރުދަނާ ނިޒާމެއް ވެސް ނެތި ކަމަަށެވެ.

ވައްކަންތައް އިތުރުވެފައިވާ ވުމަކީ ކުރީ ސަރުކާރުގެ އިހުމާލުން ވެފައިވާ ކަމެއްގެ ގޮތުގައި ފުލުހުންގެ ތަރުޖަމާނު ފާހަގަކުރައްވާފައިވާއިރު، މިކަމާ ގުޅިގެން ބައެއް މީހުންވަނީ ޚިޔާލުފާޅުކޮށްފައެވެ. އެގޮތުން ބައެއް މީހުން ބުނެފައިވަނީ 10 މަސް ކުރިން ދޫކޮށްލި ބަޔަކާ މެދު ގޮތް ނިންމަން 7 މަސް ވެސް މަދު ނޫން ކަމަށެވެ. އަދި އެހެން ބައެއް މީހުންވަނި މި ސަރުކާރު އައި ފަހުން މަޖިލިސް އިންތިހާބާ ދިމާކޮށްވެސް ކުށްވެރިން ދޫކުރިކަމަށް ބުނެފައެވެ.

ވައްކަމާއި ފޭރުމުގެ އިތުރުން މަސްތުވާތަކެތީގެ މައްސަލަތައް ވެސް ރާއްޖޭގައިވަނީ ވަރަށް ބޮޑަށް އިތުރުވެފައެވެ. އެ ގޮތުން ފިހާރަތަކާއި ކްލިނިކު ފަދަ ތަންތަން ފަޅާލައިގެން ވެސް ދަނީ ވައްކަން ކުރަމުންނެވެ.

ފުލުހުންގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ވައްކަމުގެ 1،680 މައްސަލައެއްގެ އިތުރުން ފޭރުމުގެ 235 މައްސަލައެއް ވަނީ ރިޕޯޓްކޮށްފައެވެ.