ޕަބްލިކް ސާވިސް މީޑީއާ (ޕީއެސްއެމް)ގައި މަސައްކަތްކުރާ ޚާއްސަ އެހީއަށް ބޭނުންވާ މުވައްޒަފެއްގެ ޕާކިން، މެނޭޖުމަންޓުން ބާތިލްކޮށްފިކަމަށް މައުލޫމާތު ލިބިއްޖެއެވެ.

ނަން ހާމަނުކުރުމަށް އެދި މައުލޫމާތު ހިއްސާ ކުރަމުން ޕީއެސްއެމްގެ މުވައްޒަފަކު ތޭރަ އޮންލައިނަށް މައުލޫމާތު ހިއްސާކޮށްފައިވާ ގޮތުގައި، ‎ޚާއްސަ އެހީއަށް ބޭނުންވާ މީހެއްގެ ކާރު ޕީއެސްއެމްގެ ގޯތިތެރޭގައި ޕާކު ކުރުމަށް ކުރީގެ މެނޭޖުމަންޓުން ދީފައިވާ ހުއްދަ މިހާރުގެ މެނޭޖްމަންޓުން ވަނީ ބާތިލުކޮށްފައެވެ.

ޕީއެސްއެމްގައި ވަޒީފާ އަދާކުރާ މި މުވައްޒަފަކީ ޚާއްސަ އެހީއަށް ބޭނުންވާ މީހެއްް ކަން އަންގައިދިނުމަށް ޖެންޑާ މިނިސްޓްރީން ވަނީ ލިޔުމެއްވެސްދީފައި ކަމަށާ އެހެން ނަމަވެސް އައު މެނޭޖްމަންޓުން ދެކޭގޮތުގައި އެ މުވައްޒަފަކީ ޚާއްސަ އެހީއަށް ބޭނުންވާ މީހެއް ނޫން ކަމަށްވެސް އެމީހާ ވަނީ ތޭރަ އޮންލައިނާ ހިއްސާކުރި މައުލޫމާތުގައި ކިޔައިދީފައެވެ.

މިކަމާ ގުޅިގެން ޕީއެސްއެމްގެ އެމްޑީ ޒީނާ ޒާހިރަށް މެސެޖުކޮށްލުމުޖން މެސެޖަށް ވަކި ޖަވާބެއް ދެއްވާފައިނުވެއެވެ. އަދި ޖެންޑަރ މިނިސްޓްރީގެ ސަމާލުކަމަށް މިކަން އައިސްފައިވޭތޯ މައުލޫމާތު އޮޅުން ފިލުވުމަށް ކުރި މަސައްކަތް އަދި ވަނީ ކާމިޔާބުވާ ގޮތް ނުވެފައެވެ.