2024 ވަނަ އަހަރުގެ ފުރަތަމަ ކުއަރޓާގެ ހިސާބުތަކަށް ބަލާއިރު މަސްވެރި ކަމުގެ ސިނާއަތު ވަރަށް ބޮޑަށް ރާއްޖޭގައި ދަށަށް ހިނގައްޖެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

އެމްއެމްއޭ އިން ޝާއިއު ކުރި މިއަހަރުގެ ފުރަތަމަ ކުއަރޓާގެ ކުއަރޓާލީ އިކޮނޮމިކް ބުލެޓިން ގައި ބުނެފައިވަނީ މި އަހަރުގެ ފުރަތަމަ ކުއަޓާގައި މަސް ޕްރޮސެސް ކުރާ ކުންފުނި ތަކުން މަސްގަތް މިންވަރާއި އަދި ރާއްޖޭން މަސް އެކްސްޕޯޓް ކުރި މިންވަރުވެސް ވަރަށް ބޮޑަށް ދަށަށް ގޮސްފައިވާ ކަމަށެވެ.

މްއެމްއޭ ގެ ހިސާބުތަކުން ދައްކާ ގޮތުގައި 2023 ވަނަ އަހަރުގެ ފުރަތަމަ ކުއަރޓާގައި މަސް ގަތް އަދަދަށް ވުރެ 2024 ގެ އެ މުއްދަތުގެ ތެރޭގައި މަސް ގަތް އަދަދު 11،069.2 މެޓްރިކް ޓަނު ވަނީ ދަށަށް ގޮސްފައެވެ. އެއީ 34 އިން ސައްތައިގެ ދަށްވުމެއް ކަމަށް އެމްއެމްއޭ އިން ފާހަގަ ކުރެއެވެ.

އެމްއެމްއޭ އިން ބުނާ ގޮތުގައި، މަސްވެރިކަމުގެ ސިނާއަތައް ޖުމްލަ ގޮތެއްގައި އައިސްފައިވާ ހީނަރު ކަމަށް ބަލާއިރު، 2024 ވަނަ އަހަރުގެ ފުރަތަމަ ކުއަރޓާގައި ކަޅުބިލަ މަސް ގަތް މިންވަރު އޭގެ ކުރީ އަހަރުގެ އެ މުއްދަތާ އަޅާ ބަލާއިރު 9088.9 މެޓްރިކް ޓަނު ދަށްވެފައިވެފައިވެއެވެ. ހަމަ އެހެންމެ ރީނދޫ އުރަހަ ކަންނެލި ގަތް މިންވަރުވެސް 1935.2 މެޓްރިކް ޓަނު ދަށްވެފައިވެއެވެ.

ފިނިކުރި ކަޅުބިލަ މަހާއި ފިނި ނުކުރާ ކަޅުބިލަ މަހުގެ އަގު މިހާރު ހުރީ 2023 ވަނަ އަހަރުގެ ފުރަތަމަ ކުއަރޓާގައި ހުރި ވަރަށް ވުރެ މަތީގައިކަން އެމްއެމްއޭ އިން ފާހަގަ ކުރެއެވެ.

ރާއްޖޭގެ ބާޒާރުގައި މަސް ގަންނަ އަގު މައްޗަށް ދިޔަ ސަބަބު ކަމަށް އެމްއެމްއޭ އިން ބުނެފައިވަނީ 2023 ވަނަ އަހަރުގެ ސެޕްޓެމްބަރު މަހު ސަރުކާރުން މިފްކޯ މެދުވެރިކޮށް ގަންނަ މަހުގެ އަގު ބޮޑު ކުރަން ނިންމުމާގުޅިގެން ކަމަށެވެ.

އެހެން ނަމަވެސް ހުރިހާ ކަމެއް ކުރީ ސަރުކާރުގެ ބޮލަށް ޖަހާ ނިންމާލެވެންވެސް ނެތް ކަމީ ގަބޫލުކުރަންޖެހޭ ހަގީގަތެކެވެ. ވެރިކަމަށް މިވީ 07 މަސް ދުވަސް ތެރޭ އެންމެ ނިކަމެތިކޮށްފައިވާ އެއް ދާއިރާ އަކީ މަސްވެރިކަމެވެ. ސިޔާސީ ބޭނުންތަކަށް މަސްވެރިކަމުގެ ދާއިރާއަށް ބޭނުން ގޮތެއް ހަދަމުން އަންނަ އިރު ނިކަމެތިވެ ބިކަވަނީ ރައްޔިތުމީހާއެވެ.

މި ސަރުކާރު ހުވާ ކުރި ފަހުން ރާއްޖޭގެ އިގްތިސާދު ހުރިހާ ދާއިރާއަކުންވެސް ދަށަށް ގޮސްފައިވާކަން ފާހަގަކުރެވެއެވެ.