ޖިންސީ ފުރައްސާރައިގެ ތުހުމަތުގައި އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ މަގާމުން ވަކިކުރި އިސްމާއިލް ސާޖިދު، އެ މައްސަލަ ވަޒީފާއާ ބެހޭ ޓްރައިބިއުނަލަށް ހުށަހަޅައިފިއެވެ.
މިދިޔަ މަހުގެ 29 ގައި މަގާމުން ވަކިކުރި ސާޖިދު ބުނަނީ އޭނާ ވަކިކުރީ ގާނޫނާ ހިލާފަށް ކަމަށެވެ. މި މައްސަލަ އޭނާ ހުށަހެޅީ މި މަހުގެ 4 ވަނަ ދުވަހުއެވެ.
އެމްއެމްއޭގެ އެތެރޭގެ ކޮމިޓީއެއްގެ ލަފާގެ މަތިން ގަވަރުނަރު އަހުމަދު މުނައްވަރު ވަނީ ޖަނަވަރީ 29 ގައި ސާޖިދު މަގާމުން ވަކިކުރައްވާފައެވެ.
ނަމަވެސް ސާޖިދު މި ތުހުމަތުތައް ދޮގުކުރެއެވެ. ސޯޝަލް މީޑިއާގައި އޭނާ ހާމަކުރި ގޮތުގައި އެމްއެމްއޭއިން އަމަލުކުރީ އުސޫލުތަކުން ބޭރުންނެވެ.
ފާހަގަކޮށްލެވޭ ގޮތުގައި، ސާޖިދު މި މަގާމަށް އައީވެސް ސިޔާސީ ގޮތުން ބޮޑު ރިޕޯޓެއް ލީކުވި ދަނޑިވަޅެއްގައި ގެނައި ބަދަލެއްގެ ތެރެއިންނެވެ. މިހާރު މި މައްސަލަ އޮތީ ޓްރައިބިއުނަލްގައެވެ.
