ވެރިކަމަށް އައުމަށްޓަކައި ހުރިހާ އެންމެންވެސް ދައްކާ ވާހަކައަކީ "ކުރީ ސަރުކާރު" ތަކަށް ކަންކަން ނުވި ވާހަކަ އެވެ. ރައްޔިތުންނަށްޓަކައި ކަން ކަން ކުރުމުގައި ނުކުޅެދުނު ވާހަކަތަކެވެ. ރައްޔިތުންގެ އަރިހަަށް ވަޑައިގެން ވެރިކަން ލިބިއްޖާ އެވެނި މިވެނި ކަމެއް ކޮށްދޭނަމޭ ކިޔާ ވައުދުތަކާއި އަހުދުތަށްވެއެވެ. ވެރިންގެ ވާހަކަތައް އަޑުއަހާފައި ބުނާނީ އަލަށް ދެ ލޯބިވެރިން ރައްޓެހިވެގެން ހަނދާއި ތަރިތައް ގެނެސްދޭނަމޭ ބުނާހެންނެވެ.

ހަމަ އެބީދާއިން އަދުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒުވެސް ވެރިކަމަށް އައީ ރައްޔިތުންގެ ކައިރިއަށް ގޮސް ވައުދުތަކާއި އަހުދުތަކެއް ވުމަށްފަހުގައިއެވެ. މިކަން ދޮގު ކުރާނެ އެއްވެސް ރައްޔިތެއްް ނުހުންނާނެއެވެ. ވައުދޭ ބުންޏަސް ވީ ވައުދެވެ. ވައުދުތައް ވަމުން ގެންދެވި އިރު އެމަނިކުފާނުގެ އަރިހުގައި ތިއްބެވި ދެތިން ބޭފުޅަކު ދެއްކި ވާހަކަ ވެސް އަޅުގަނޑަށް އިވުނެވެ. އެގޮތުން އެ ހުރިހާ ވައުދެއް ހަމަ މުއިއްޒަށް ފުއްދޭނެބާއޭ؟

ވައުދު ގޯނި އޮއްސާލީ ހަމަ އެކަނި ކުރީގެ ރައީސް އިބްރާހިމް މުހައްމަދު ޞާލިހެއް ނޫނެވެ. މިކަން މިއަދު ހުރިހާ އެންމެންނަށް ވެސް ސާފެވެ. ރައީސް މުއިއްޒުގެ އެންމެ ބޮޑު އަދި އެންމެ ފުރަތަމަ ވައުދުގެ ވާހަކައިން ފަށާނަމެވެ. އާދެ! ނުހައްގުން ޖަލުގައި ބަންދުކޮށްގެން ގެންގުޅުއްވި އޭރުގެ އިދިކޮޅުގެ ލީޑަރ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރައްވާނެ ކަމުގެ ވައުދެވެ. މިއަދު ރައީސް ޔާމީން ދިވެހި ރާއްޖޭގެ ހައި ކޯޓުން މިނިވަން ކުރި ނަމަވެސް މިއީ ރައީސް މުއިއްޒު ކުރެއްވި ކަމެއް ނޫނެވެ. އެއީ ވެރިކަމަށް އަންނަ ފުރަތަމަ ދުވަހު ރައީސް ޔާމީން މިނިވަންކުރައްވާނެ ކަމަށް ވިދާޅުވެ، ވެރިކަން ލިބި 4 މަހަށްވުރެ ގިނަ ދުވަސް ފާއިތުވި އިރުވެސް ރައީސް ޔާމީން މިނިވަން ކުރުމަށްޓަކައި ކުޑަމިނުން އެމަނިކުފާނުގެ ޝަރީއަތްތަކުގެ އަޑުއެހުން އަވަސްކުރުމަށް ވެސް ރައީސް މުއިއްޒު ގޮވާލައްވާފައި ނުވެއެވެ.

ދެން އޮތް އަނެއް ބޮޑު ވައުދުގެ ވާހާކަ ފާހަގަކުރަން ވެސް ހެޔޮނުވާނެއެވެ. "އިންޑިޔާ ސިފައިން" ގެ ވާހަކަ އަކީ މި ގައުުމުގެ އެއްވެސް ރައްޔިތަކަށް އައު ވާހަކައެއް ނޫނެވެ. ވެރިކަމަށް އައީ ރާއްޖޭގައި ގާއިމްވެފައި ތިބި އިންޑިޔާގެ ސިފައިން އަނބުރާ ފޮނުވާލާނެ ކަމުގެ ވައުދާއެކުގައެވެ. ނަމަވެސް މިކަން ވެސް އެމަނިކުފާނު ދުއްވާލީ ތޮޅިއަށެވެ. ތެދެއް. އިންޑިޔާ ސިފައިން ފޮނުވާލައިފިއެވެ. ނަމަވެސް ބަދަލުގައި އަނެއްކާވެސް މި ގެނައީ އެ ގައުމުގެ އަސްކަރިއްޔާގެ ބައެކެވެ. އިންޑިޔާ ސިފައިންގެ ޔުނީފޯމް އަޅައިގެން ނުތިބޭކަން އެކަންޏެވެ. މިއީ ވެސް ނުފުއްދުނު ވައުދެކެވެ.

ކެބިނެޓެއް އައްޔަން ކުރައްވާނީ އިލްމީ، ގާބިލް އަދި ތަޖުރިބާކާރު ބޭފުޅުންކަމަށް ވިދާޅުވެ ވެރިކަމަށް އައުމަށްފަހު ކެބިނެޓަށް އައްޔަންކުރެއްވީ ނުގާބިލު ވެރިންނެވެ. އެގޮތުން ފަތުރުވެރިކަމާ ބެހޭ ވުޒާރާގެ ވަޒީރު މިސާލަކަށް ނެގިދާނެއެވެ. އެމަނިކުފާނު ބޭރުގެ ގައުމުތަކަށް ރާއްޖެ ތަމްސީލް ކުރުމަށް ވަޑައިގެން އެނބުރި އަންނަނީ މަލާމާތާއި ފުރައްސާރައާއެކުއެވެ. ވެރިކަމަށް "ޕީއެޗްޑީ" ހޯލްޑާރ އެއް އައި ނަމަވެސް ރައްޔިތުން ކުރި އުންމީދުގައި ކޮޅުފައިން ޖަހާލާ ކެބިނެޓަށާއި ސަރުކާރުގެ އެހެނިހެން މަގާމްތަކަށް އައްޔަން ކުރެއްވީ ނާގާބިލް ފަރާތްތަކެވެ. ދެން ހަމާ މިކަމާ ގުޅުވާ އެމަނިކުފާނުގެ 700 އަށް ވުރެ ސިޔާސީ މަގާމް ގިނަ ނުކުރާނެ ކަމުގެ ވައުދުގެ ވާހަކަވެސް ދެއްކޭނެއެވެ. މިއަދު އެ ވައުދު ވެސް ކަފުނަށްވެއްޖެއެެވެ. 3000 އަށްވުރެ ގިނަ ސިޔާސީ މަގާމް އުފައްދައިފިއެވެ. ރައްޔިތުންގެ ފައިސާއިން އެއްވެސް މަސައްކަތެއް ނުކޮށް ރީތިކޮށް ތިބޭ ސިޔާސީ ވެރިންނަށް މުސާރަ ދިނުމަށް އެބަ ހޭދަކޮށްލައެވެ. މިއީ މުޅީންވެސް ރައީސް މުއިއްޒު ނުކުރާނެ ކަމަށް ވިދާޅުވި ކަންކަމެވެ. މި ވައުދުތަކެއް ވެސް ނުފުއްދުނެވެ.

ދެން މި ދަނޑިވަޅުގައި މަސްވެރިންނަށް ރައީސް މުއިއްޒު ވެވަޑައިގެންނެވި ވައުދުގެ ވާހަކަވެސް ދައްކާލުން މުހިންމެވެ. މަސްވެރިން ބާނާ މަސް، ކިރާތާ 48 ގަޑި އިރު ތެރޭގައި މަސްވެރިންނަށް ފައިސާ ދޭނެ ކަމުގެ ވައުދުވިއެވެ. މަސްވެރިން ބާނާ ކަޅުބިލަ މަސް 100 ރުފިޔާ އަށް މިފްކޯއިން ގަންނާނެ ކަމަށްވެސް ރައީސް މުއިއްޒު ވިދާޅުވިއެވެ. ނަމަވެސް ވެރިކަމަށް އައުމަށްފަހު މަސްވެރިން މަތިން ވެސް ހަނދާން ނައްތާލިއެވެ. މަސް ކިރާތާ 2 މަސް 3 މަސް ވާއިރުވެސް މަސްވެރިންނަށް ފައިސާ ނުދެވެއެވެ. އެ ފައިސާ ހޯދަން މަސްވެރިން މި ޖެހެނީ އާދޭސް ކުރާށެވެ. އެއްކަލަ 100 ރުފިޔާއަށް ގަންނާނެ ކަމަށް ބުނި ކަޅުބިލަ މަސް މިއަދު މިފްކޯ އަކުން ނުގަނެވޭނެ ކަމަށް ވެސް ވިދާޅުވެއްޖެއެެވެ. މީގެން އެންމެ ވައުދެއް ވެސް ފުއްދުނީކީ ނޫނެވެ.

އަދިވެސް އެމަނިކުފާނަށް ނުފުއްދުނު ވައުދުތަކުގެ ލިސްޓެއް އެބައޮތެވެ. ނުވާވަރުން ވައުދު ވަންޏާވާނީ މިފަދައިންނެވެ.