މާލެ ސިޓީ ކައުންސިލްގެ ތިން ގޮނޑިއަށް ވެސް ވާދަކުރަނީ އެމްޑީޕީ އާއި ޕީއެންސީން ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
އެގޮތުން އަންނަ މަހުގެ 20 ވަނަ ދުވަހު ބާއްވަން ހަމަޖެހިފައި ވަނީ މައްޗަންގޮޅި މެދު ދާއިރާއާއި ހެންވޭރު ހުޅަނގު ދާއިރާ އަދި ހުޅުމާލެ ދާއިރާގެ ކައުންސިލް މެމްބަރު އިންތިހާބު ކުރުމަށް ބާއްވާ ބައި-އިލެކްޝަނެވެ.
މާލެ ސިޓީ ކައުންސިލްގެ މައްޗަންގޮޅި މެދު ދާއިރާއަށްް ޕީއެންސީ ގެ ފަރާތުން ވާދަކުރައްވަނީ ފާތިމަތު އިޝާން އަލީ، އައިނާއެޑަމްސް / މާލެ އަދި އެމްޑީޕީގެ ފަރާތުން ހައްވާ ޝިފާނާ، މއ. ރިހިރާޅު / މާލެ އެވެ.
މާލެ ސިޓީ ކައުންސިލްގެ ހެންވޭރު ހުޅަނގު ދާއިރާއަށްް ޕީއެންސީ އިން ވާދަކުރައްވަނީ ފާތިމަތު ޝައުފާ ސަލީމް، ހ. އިސްފަހާން އާއި އެމްޑީޕީގެ ފަރާތުން މުހައްމަދު އަލީ ޖިނާދު، ހ. ގްރީންޒެސްޓް އެވެ.
މާލެ ސިޓީ ކައުންސިލްގެ ހުޅުމާލެ ދާއިރާ ދާއިރާއަށްް ޕީއެންސީ އިން ވާދަކުރައްވަނީ އަލީ އައިމަން، ހ. ފުޖޭރާ އާއި އެމްޑީޕީ އިން އަހްމަދު ރަޝީދު (ތުތީ)، ހުޅުމާލެ. މާވަހަރު 3 އެވެ.
މި ތިން ދާއިރާގެ ބައި އިލެކްޝަންވެސް ބާއްވަނީ ކުރިން މި ދާއިރާތައް ތަމްސީލްކުރި ކައުންސިލް މެމްބަރުން ނިމިދިޔަ ރައްޔިތުންގެ މަޖިލީހުގެ އިންތިހާބުގައި ވާދަކުރައްވާ އެ މަގާމަށް އިންތިހާބުވެވަޑައިގަތުމާ ގުޅިގެން ކަން ފާހަގަކޮށްލެވެއެވެ.
