ބާނާ މަހުގެ ފައިސާ ލިބެނީ އަބަދުވެސް ކޮންމެ ވެސް މުޒާހަރާއެއް ކޮށްގެން ކަމަށް މަސްވެރިން ބުނެފިއެވެ.

މަސްވެރިއެއް އޭނާގެ ހިތުގެ އުދާސްތައް ވަނީ ވީޑިޔޯއެއްގެ ޒަރީއާއިން ފާޅުކޮށްފައެވެ.

އެގޮތުން އެ ވީޑިޔޯގައި މަސްވެރިޔާ ވަނީ ބާނާ މަހުގެ ފައިސާ ސަރުކާރުން ނުދޭތީ ވަރަށް ބޮޑެތި ގޮންޖެހުންތަކަކާއި ކުރިމަތިލާން ޖެހޭ ކަމަށް ބުނެފައެވެ.

އެގޮތުން ކަރަންޓް ބިލް ދެއްކުމަށް އުނދަގޫވާ ވާހަކަވެސް އެ މަސްވެރިޔާ ވަނީ ފާހަގަކޮށްފައެވެ. އަތުގައި ފައިސާ އެއް ނުހުންނަ އިރު ފޮނުވާ ކަރަންޓް ބިލް ވެސް ބޮޑުކޮށްފައި ފޮނުވާކަމަށް ވެސް މަސްވެރިޔާ ވަނީ ބުނެފައެވެ. އެގޮތުން 2000 ރުފިޔާގެ ކަރަންޓް ބިލް 4000 ރުފިޔާއަށް ހަދަނީ ސަރުކާރުން ގަސްތުގައި ރައްޔިތު މީހާ ނިކަމެތިކޮށްލުމުގެ ބޭނުމުގައި ކަމަށް ވެސް އެ ވީޑިޔޯގައި މަސްވެރިޔާ ވަނީ ބުނެފައެވެ.

އޭގެއިތުރުން މަސްވެރިޔާ ވަނީ 48 ގަޑި އިރު ތެރޭ ފައިސާ ނުދެވެންޏާ 15 ދުވަސް ތެރޭ ފައިސާ ދެވޭނެ ކަމުގެ ޔަގީންކަން މަސްވެރިންނަށް ދިނުމަށް ގޮވާލާފައެވެ.

މަސްވެރިންނާ ދެކޮޅަށް ވެރިކަން ކުރަން ފުރުސަތު ނުދޭނެ ކަމަށާއި މިއަދު މިއޮތް ވެރިކަން ގެނައުމުގައި މަސްވެރިން ވަރަށް ބޮޑު ދައުރެެއް އަދާކޮށްފައިވާނެކަމަށް ވެސް އެ މަސްވެރިޔާ ވަނީ ބުނެފައެވެ.

މަސްވެރިން މަސްކިރާތާ 48 ގަޑިއިރު ތެރޭ ފައިސާ ދޭނެ ކަމުގެ ވައުދާ އެކު ވެރިކަމަށް އައުމަށްފަހު މަސް ދެމަސް ވެގެންދާއިރުވެސް މަސްވެރިންނަށް ފައިސާ ދިނުމުގައި ސަރުކާރުން އަންނަނީ އިހުމާލުވަމުންނެވެ.