ސައިކަލެއް ޓޯ ކުރުމުގައި ފުލުހުން ބޭއަދަބީކޮށް ސައިކަލް ދުއްވި މީހާއާ މުއާމަލާތްކުރި މައްސަލައެއް ބަލަމުންދާކަން ހާމަކޮށްފިއެވެ.

ލައިސަންސް ނެތި ގަވާއިދާ ހިލާފަށް ދުއްވި ސައިކަލެއް ޓޯކުރުމާ ގުޅިގެން ސޯޝަލް މީޑިއާގައި ދައުރުވަމުންދާ ވީޑިއޯގައި ފުލުހުންގެ މައްޗަށް ތުހުމަތު ކޮށްފައިވާ ކަންކަމާ ގުޅިގެން ނޫސްވެރިންނަށް ފޮނުވި މެސެޖެގައި ފުލުހުން ބުނެފައިވަނީ، މި މައްސަލައަކީ މި މަހުގެ 12 ވަނަ ދުވަހު ތ.ވޭމަންޑޫ ސްކޫލުގައި ކުރިއަށްގެންދިޔަ ހަރަކާތަކާ ގުޅިގެން އެއްގަމު އުޅަނދު ވަނުން މަނާކޮށް ބޯޑު ހަރުކޮށްފައި ހުއްޓާ އެ ސަރަހައްދަށް ވަނުމުން ފުލުހުން ބެލި ބެލުމުގައި ސައިކަލް ދުއްވި މީހާގެ އަތުގައި ލައިސެންސް ނެތުމުން އޭނާ ޖޫރިމަނާކޮށް ސައިކަލް ޓޯ ކޮށްފައިވާ މައްސަލައެއް ކަމުގައެވެ.

މި މައްސަލައާ ގުޅިގެން ސައިކަލް ދުއްވި ފަރާތުގެ އާއިލާއިން ވަނީ ސައިކަލް ދުއްވީ 18 އަހަރުގެ ކުއްޖެއް ކަމަށާއި އޭނާ ސައިކަލް ދުއްވީ ލައިސެންސް ނެތިކަމަށް ވެސް އެއްބަސްވެފައެވެ. ސައިކަލް ދުއްވުމަކީ އޭނާ ކުރި ކުށެއްކަމަށް ކަމަށް ގަބޫލް ކުރާކަމަށް ވެސް ވަނީ ބުނެފައެވެ.

ނަމަވެސް 18 އަހަރުގެ ކުއްޖަކާ ފުލުހުން ބޭއަދަބީ ކޮށް ވާހަކަ ދެއްކުމުން އެކަން ބަލައިނުގަނެވޭނެ ކަމަށް އާއިލާއިން ވަނީ ބުނެފައެވެ.

ސައިކަލުގެ ވެރިފަރާތުގެ އާއިލާގެ ކަންބޮޑުވުން އެ ހިދުމަތުގެ ސަމާލު ކަމަށް އައިސްފައިވާ ކަމަށް ފުލުހުންގެ ހިދުމަތުން ބުންޏެވެ. އަދި އެ ހާދިސާ އިތުރަށް ބެލުމަށް ފަހު މި ޚިދުމަތުގެ ފަރާތުން ޚިދުމަތް ދިނުމުގައި ރަނގަޅު ކުރަން ޖެހޭ ކަންކަން ރަނގަޅު ކުރާނެ ކަމުގެ ޔަގީންކަން ދީފައިވެއެވެ.

ފުލުހުންގެ ފަރާތުން ބައެއް ހާދިސާތަކުގައި ހާލަތާ ނުބައްދަލު ބާރުގެ ބޭނުންކުރުމާ އަދި މުއާމަލާތްކުރުމުގައި ބަހުރުވަ ގެންގުޅޭ ގޮތުގެ ކަންބޮޑުވުމަކީ މީގެ ކުރިންވެސް އާންމުން ފާޅުކޮށްފައިވާ ކަންބޮޑުވުމެކެވެ.