ދިރާގުގެ "ވިން އަ ޓެސްލާ" ޕްރޮމޯޝަނުގެ ދަށުން ގުރުއަތުން ހޮވޭ ކަސްޓަމަރަކަށް ދޭ ޓެސްލާ ކާރު ދައްކައިލައިފި އެވެ.

މި ކާރު ރާއްޖެ ގެނެސް، މީޑިއާތަކަށް ދައްކައިލުމުގެ ގޮތުން ދިރާގު ހެޑް އޮފީހުގައި ވަނީ ހާއްސަ އިވެންޓެއް ވެސް ބާއްވާފައެވެ.

މި ޕްރޮމޯޝަނުގެ ދަށުން ނަސީބުވެރި އެއް ކަސްޓަމަރަކަށް ދޭން ނިންމާފައިވަނީ ޓެސްލާ މޮޑެލް ތިނެއްގެ ހުދުކުލައިގެ އިލެކްޓްރިކް ކާރެކެވެ. މިއީ ރާއްޖެއަށް ގެނައި މި މޮޑެލްގެ ދެވަނަ ކާރު ކަން ދިރާގުން ވަނީ ފާހަގަކުރައްވާފައެވެ.

މި ޕްރޮމޯޝަނާއި ގުޅޭ ގޮތުން މައުލޫމާތު ދެއްވަމުން ދިރާގުގެ އެސިސްޓެންޓް މެނޭޖާ އެޑްވަޓައިޒިން، ހަސަން ޝާރިހު އާދަމް ވިދާޅުވީ ޕްރޮމޯޝަނުގައި ބައިވެރިވުމުގެ ފުރުސަތު ދިރާގުގެ ކަސްޓަމަރުންގެ އިތުރުން، އަލަށް ދިރާގާއި ގުޅޭ ކަސްޓަމަރުންނަށް އަދި ވެސް އެބަ އޮތް ކަމަށެވެ.

މި ޕްރޮމޯޝަންގައި ބައިވެރިވެވޭނީ ދިރާގު ޕޯސްޓްޕެއިޑް 450 އަދި ފައިބަރ ބްރޯޑްބޭންޑް 30M އިން މަތީގެ ޕެކޭޖްއަކަށް ސަބްސްކްރައިބް ކުރާ ކަސްޓަމަރުންނަށެވެ. ޕްރޮމޯޝަންގައި ބައިވެރިވުމަށް ޕްރޮމޯޝަނަށް ހާއްސަ ޕޯޓަލް މެދުވެރިކޮށް ރެޖިސްޓަރީ ވާން ޖެހޭނެ އެވެ.

ދިރާގު ވިން އަ ޓެސްލާ ޕްރޮމޯޝަންގެ ނަސީބުވެރި ފަރާތް ހޮވުމަށް ހަމަޖެހިފައިވަނީ ޖޫން މަހު، އަލްހާ އީދާއި ދިމާކޮށް ކަމަށް ވެސް އެ ކުންފުނިން ވަނީ މައުލޫމާތުދީފައެވެ.