ހދ. ހަނިމާދޫ ގެއެއްގެ ތެރޭގައި މަރުވެފައި އޮތް ދިވެހި ފިރިހެނަކު ފެނިފައިވާ ކަމަށް ދިވެހި ފުލުހުންގެ ހިދުމަތުން ބުނެފިއެވެ.
ފުލުހުން ބުނިގޮތުގައި 64 އަހަރުގެ އެ މީހާއަކީ އެ ރަށުން ކޮޓަރިއެއް ކުއްޔަށް ހިފައިގެން ދިރިއުޅޭ މީހެކެވެ.
އަދި އޭނާ މަރުވެފައި އޮއްވައި ފެނުނީ ރޭ ކޮޓަރިއަށް ވަނުމަށްފަހު ހަބަރެއް ނުވެގެން ފުލުހުންނަށް ލިބުނު މައުލޫމާތަކާއި ގުޅިގެން ގޮސް ބެލުމުން ކަމަށް ވެސް ފުލުހުން ވަނީ ބުނެފައެވެ.
އޭނާ ދިރިއުޅޭ ކޮޓަރިއަށް ވަދެ ބެލި އިރު އޭނާ އޮތީ އެނދުމަތީގައި ކަމަށާއި އެއްވެސް ހަރަކާތެއް ނުކުރާ ކަމަށް ފުލުހުން ބުންޏެވެ.
ހަނިމާދޫ ހެލްތް ސެންޓަރަށް އެ މީހާ ގެންދިޔައިރު ވެސް މަރުވެފައި އޮތް ކަން ހެލްތް ސެންޓަރުން ވަނީ ކަށަވަރުކޮށްދީފައެވެ.
އޭނާ މަރުވެފައިވަނީ ކިހިނަކުން ކަމެއް ފުލުހުން ހާމަކޮށްފައިނުވެއެވެ.
ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.
