ރައްޔިތުންގެ މަޖިލީހުގެ ގޮނޑިތައް ކާމިޔާބު ކުރުމަށްޓަކައި ރައީސް ޑރ. މުހައްމަދު މުއިއްޒު، ރިޝްވަތުގެ ގޮތުގައި ބެހި މަގާމުތަކުން މީހުން ވަކިކުރަން ފަށައިފިއެވެ.

މައުލޫމާތު ލިބިފައިވާ ގޮތުގައި މަޖިލިސް އިންތިހާބާ ދިމާކޮށް އެކި އެކި ވުޒާރަތަކަށް ނުކަތާ ވަރަށް ވަޒީފާ ދީފައިވެއެވެ. އެގޮތުން ސަރުކާރުގެ ގިނަ ވުޒާރާތަކަށް 40 އާ ގާތް ކުރާ އަދަދަކަށް ސިޔާސީ މީހުން އައްޔަން ކޮށްފައިވާކަމަށް ބައެއް ވުޒާރާތަކުން ހާމަކޮށްފައިވާ މައުލޫމާތުން ފެންނަން އެބަހުއްޓެވެ.

ސިޔާސީ މަގާމުތަކުގައި ތިބި މީހުންގެ ތެރެއިން ބަޔަކު ކަނޑައަމުން ގެންދަނީ އެމީހުންގެ ޕާރފޯމަންސަށް ބެލުމަށް ފަހު ކަމަށް މައުލޫމާތު ލިބިފައިވެއެވެ. ނަމަވެސް ޕާފޯމަންސް ސަރުކާރުން މާނަ ކުރާ ގޮތެއް ހާމަކޮށްފައިނުވެއެވެ.

މީގެ އިތުރުން ބައެއް ސިޔާސީ ވަޒީފާތަކުގައި ތިބި މީހުން ކުންފުނިތަކަށް ވެސް ބަދަލުކުރަމުން ދާ ކަމަށް މައުލޫމާތު ލިބިފައިވެއެވެ.

މަޖިލިސް އިންތިހާބާ ދިމާކޮށް ގިނަ ވަޒީފާތަކެއް ނުހައްގުން ދީފައިވާ ކަމުގެ ޝަކުވާ ފެންމަތިވީ ނަމަވެސް އެންޓި ކޮރަޕްޝަން ކޮމިޝަނުން އިސްނަގައިގެން އެކަން ބަލާފައިނުވެއެވެ.

މަތި ލުއި ޚަރަދު ކުޑަ ސަރުކާރެއް ހިންގާނެ ކަމުގެ ވައުދަކީ ރައީސް މުއިއްޒުގެ ރިޔާސީ ވައުދެއް ނަމަވެސް ފެނިގެން ދަނީ ސިޔާސީ މަގާމުތައް 3000 އަށް ވުރެ ގިނަ ވެފައިވާ ތަނެވެ. ނަމަވެސް ރައީސް މުއިއްޒު ވިދާޅުވެފައިވާ ގޮތުގައި އެމަނިކުފާނުގެ ސަރުކާރެެއްގައި 700 އަށް ވުރެ ސިޔާސީ މަގާމު ގިނަ ނުވާނެއެވެ.

ސަރުކާރުގެ ސިޔާސީ މަގާމުތައް ގިނަވެ ބައެއް ވުޒާރާތަކުގައި އެ މުވައްޒަފުން މަސައްކަތްކުރާނެ މާހައުލެއް ނެތުމުން ގިނަ މުވައްޒަފުން ސައިން އިން ވުމަށް ފަހު ދަނީ ގެއަށް ކަން ވަނީ ހާމަވެފައެވެ. އަދި 8 ގަޑިއިރު ހަމަވުމުން ސައިން އައުޓުވާން އޮފިހަށް ދަނީކަން ވެސް ވަނީ ހާމަވެފައެވެ.