ރަސްމާލެ ނަމުގައި ސަރުކާރުން ހިންގީ ބޮޑު ވައްކަމެއްކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައިއެވެ.

މި ސަރުކާރުން ރަސްމާލޭގެ މަޝްރޫއު ކުރިއަށް ގެންދަން ދައުލަތުގެ ބަޖެޓުން ފައިސާ ނުލިބުމުން ހޭދަ ކުރަމުން އައި ޓެކްސް ޕޭޔަރުންގެ ފައިސާކަމަށް މަލީހު ވިދާޅުވިއެވެ. އަދި ދައުލަތުން ހިންގާ ސްކޭމްތަކަށް މިފަދައިން ޓެކްސް ޕޭޔަރުންގެ ފައިސާ ބޭނުންކުރުން މަލީހު ވަނީ ކުށްވެރި ކޮށްފައިއެވެ.

ސަރުކާރުން މިފަދަ ސްކޭމްތައް ހިންގަމުން އަންނަ އިރު، އެންޓި ކޮރަޕްޝަންސް ކޮމިޝަން، އޭސީސީއާއި، އޮޑިޓު އޮފީހާއި މަޖިލިސްވެސް ހަނު ކަމަށް މަލީހު ވިދާޅުވިއެވެ.

މަލީހު އިތުރަށް ވިދާޅުވީ ދެން ހަމަ ބަދަލަށް މިލިއަނުން ޓެކްސް ޕޭޔަރުންގެ ފައިސާ ދީފައި މިފަދަ މަޝްރޫއުތަކުގެ ބަހަނާގައި ހިންގާ ސްކޭމްތަކާއި މެދު އެއްޗެއް ނުބުނެ ރައްޔިތުން ތިބެންވީތޯވެސް ސުވާލު އުފައްދަވާފައިއެވެ.

ޑިސެމްބަރު 18، 2023 ގައި އަމަލީ މަސައްކަތް ފެށި ރަސްމާލެ މަޝްރޫއަށް ދައުލަތުގެ ބަޖެޓުން އެއްވެސް ފައިސާއެއް ނުދާނެ ކަމަށް ރައީސް ޑރ. މުހައްމަދު މުއިއްޒު އޭރު ވިދާޅުވި އެވެ. ރައީސް އެފަދައިން ވިދާޅުވީ މި އަހަރުގެ ބަޖެޓުގައި މި މަޝްރޫއުގެ ބޭނުމަށް ހިމެނި 400 މިލިއަން ރުފިޔާ މަޖިލީހުން އުނިކުރުމާ ގުޅިގެންނެވެ.

ނަމަވެސް ފާހަގަކޮށްލަން ޖެހެ ކަމަކީ، ބަޖެޓުގައި ނުވެސް ހިމަނަނީސް ރައީސް މުއިއްޒު ރަސް މާލެ ޕްރޮޖެކްޓު ފައްޓަވާ އެ މަސައްކަތް ކޮންޓްރެކްޓަރާއި ހަވާލު ކުރި ބަލަން ޖެހޭ މިންވަރަށް ނުބަލާ ކަމަށާއި މަސައްކަތް ހަވާލު ކުރި ކުންފުންޏަކީ އެކްސްކަވޭޓަރެއްވެސް އޮތް ކުންފުންޏެއް ނޫން ކަމަށް އެކި ފަރާތްތަކުން އަންނަނީ ބުނަމުންނެވެ.