މާލެ ބައިނަލްއަގްވާމީ ކޮމާޝަލް ޕޯޓު ދިގު މުއްދަތަކަށް ބޭރުގެ ކުންފުންޏަޔަކަށް ދޫކޮށްލަން އުޅޭއިރު އެމްޑީޕީއިން އެކަމާ ދެކޮޅަށް ބަސް ނުބުނަކީ އެ ޕްރޮޖެކުޓުގެ ތެރެއިން ނާޖާއިޒް ފައިދާތަކެއް ލިބޭ އެމްޑީޕީގެ ބޮޑުންތަކެއް ތިބުމުންކަމުގެ ތުހުމަތުކޮށްފިއެވެ.

މިފަދައިން ތުހުމަތު އަމާޒުކޮށްފައިވަނީ ހަސަން ކުރީގެ ނަމުގައި އެކްސްގައި ހިންގަމުން އަންނަ ހެންޑްލްގައެވެ.

އެގޮތުން އެ ހެންޑްލްގައި ބުނެފައިވާ ގޮތުގައި މާލޭ ޕޯޓު ބޭރުގެ ކުންފުންޏަކަށް ދިނުމަށް ސަރުކާރުން މަސައްކަތް ފަށާފައިވައިރު އެކަމާ ދެކޮޅަށް މަޖިލީހުގައި އެމްޑީޕީއިން ވާހަކަ ނުދައްކަނީ އެ ޕާޓީގެ މަޖިލިސް މެމްބަރު މީކާއިލް އަހުމަދު ނަސީމަށް އެ ޑީލުގެ ތެރެއިން ނާޖާއިޒް މަންފާއެއް ލިބޭތީ ކަމަށެވެ.

މީގެ އިތުރުން ކުރުސީ ވަނީ އެމްޑީޕީގެ ޗެއަރޕާސަން ފައްޔާޒު އިސްމާއިލަށް ވެސް ތުހުމަތުގެ އިނގިލި ދިއްކޮށްފައެވެ. އެގޮތުން ފައްޔާޒަށްވެސް އެ އެމްއޯޔޫގެ ކޮޕީ ލިބިފައިވާ ކަމަށާ ނަމަވެސް ފައްޔާޒު މިވަގުތު ކުރީގެ މިނިސްޓަރު ޝިއުނާ ގޮވައިގެން ސިޑްނީއަށް އޮޕެރާ ހައުސް ބަލަން ގޮސް ހުރިއިރު ޕޯޓު މައްސަލައިގައި ހަނު ހުންނަނީ މިއީ އެމްޑީޕީއާ ވެސް ގުޅިގެން ސަރުކާރުން ހިންގަމުން ގެންދާ ޖަރީމާއަކަށް ވުމުން ތޯ ސުވާލު އުފައްދާފައިވެއެވެ.

މާލޭ ބައިނަލްއަގްވާމީ ޕޯޓު ދިގު މުއްދަތަކަށް ބޭރުގެ ކުންފުންޏަކަށް ދޭން ސަރުކާރުން ނިންމާފައިވާއިރު މިކަމާ ގުޅިގެން ގިނަ ބަޔަކު ގެންދަނީ ކަންބޮޑުވުން ފާޅުކުރަމުންނެވެ. އެގޮތުން ގައުމުގެ ހަރު މުދާ ނުވިއްކާ ވެރިކަން ކުރަން ގައުމުގެ ވެރިން ދަސްކުރަން ވެއްޖެ ކަމަށް މީސް މީޑިޔާ ޚިޔާލުފާޅުކުރާ ގިނަ ބަޔަކު ބުނެފައިވެއެވެ.