ނ. އަތޮޅުގައި އޮންނަ ފަޅު ރަށެއް ކަމަށްވާ ވަވަތިއަށް އިއްޔެ ލެއްގި ޑިންގީގައި ތިބި މީހުންނަކީ ހާލުގައި ޖެހިފައި ތިބި ބައެއް ކަމަށް ފުލުހުން ބުނެފިއެވެ.

ވަވަތިއަށް ލެއްގި ޑިންގީގައި ތިން މީހުން ތިއްބެވެ. އެއީ ސޯމާލިއާ އަށް ނިސްބަތްވާ ތިން ފިރިހެނުންނެވެ.

އެމީހުންނާ ގުޅޭ ގޮތުން ސޯޝަލް މީޑިއާގައި އެކި ވާހަކަތައް ފަތުރަމުން ދަނިކޮށް މިއަދު މީޑިއާތަކަށް ފޮނުވި މެސެޖެއްގައި ފުލުހުން ބުނީ އައުޓް ބޯޑް އިންޖީނެއް އަޅާފައި އޮތް ކުޑަ ކުޑަ ޑިންގީގައި ލެއްގި މީހުންނަކީ ކަނޑުމަތީގައި ހާލުގައި ޖެހި ބެހިގެން އާދެވުނު ބައެއްކަން ބެލި ބެލުމުން އެނގިފައިވާ ކަމަށެވެ.

"އެމީހުން ހޮޅުދޫއަށް ގެންގޮސް ކައުންސިލްގެ އެހީތެރިކަމާއެކު ވަގުތީ ގޮތުން އެމީހުންނަށް ވަނީ ބޯހިޔާވަހިކަން ފޯރުކޮށްދީފައި،" ފުލުހުން ބުންޏެވެ.

އެމީހުންނަކީ ކަނޑު ފޭރޭ ބައެއް ކަމަށް ބައެއް މީހުން ވަނީ ސޯޝަލް މީޑިއާގައި ތުހުމަތުކޮށްފަ އެވެ. ނަމަވެސް އެފަދަ އެއްވެސް ހެއްކެއް މިހާތަނަށް ލިބިފައެއް ނުވެ އެވެ. ފުލުހުން ދަނީ ހޮޅުދޫ ކައުންސިލާ ގުޅިގެން އެމީހުންނަށް އެހީތެރިކަން ފޯރުކޮށްދެމުންނެވެ.

މީގެ ކުރިން އެކި ފަހަރުމަތިން ސޯމާލިއާ މީހުން ޑީންގީގައި ރާއްޖެއަށް ލައްގާފައި އެބަހުއްޓެވެ.