ދިވެހިންގެ ހައްގުގައު މީގެ ކުރިން އަޑު އުފުލާ ވަކާލާތުކުރި ފަރާތްތައް މިއަދު ހަނު ހުންނަވާ ކުރިން ކަންތައްވި ފަދައިން ކަންތައް ވާން ދޫކޮށްލައިފައިވާ ވުމުން އެކަމާއި ކަންބޮޑުވުން ފާޅުކޮށް ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ފޭސްބުކްގައި ޕޯސްޓްކޮށްފައިވާކަން ފާހަގަކުރެވިފައިވެއެވެ.

މިގޮތުން ކޮންމެ ކަމެއްވެސް ކުރީ ސަރުކާރުގެ ބޮލަށް ޖަހައިގެން ތިބެވެން ނެތް ކަމަށާއި ބަދަލަކަށް އެދި ރައްޔިތުން ދިން ވޯޓު މިއަދުގެ ސަރުކާރުން އެއްވެސް އަގެއް ހުރި އެއްޗަކަށް ހަދާފައިވާ ނުވާ ކަމަށް ސީޕީ ހުސައިން ފާހަގަކޮށްފައިވެއެވެ.

މީގެ އިތުރުން، ނިމިދިޔަ ސަރުކާރުން ރާއްޖޭގެ ކަނޑުގެ ބޮޑު ބައެއް އިންޑިޔާއަށް ދިން މައްސަލާގައި ގިނަ އަދަދެއްގެ ބަޔަކު އިހުތިޖާޖުކޮށް، އަޑު އުފުލާ އޭރުގެ ސަރުކާރުގެ ވަރަށް ބޮޑަށް ފާޑުވިދާޅުވަމުންދިޔަ މަންޒަރު ފެނިގެން ގޮސްފއިވާ ކަމަށާ އަދި ރާއްޖޭގެ މައި އެއާޕޯޓް ވެލާނާ އިންޓަނޭޝަނަލް އެއާޕޯޓް ބޭރުގެ ކުންފުންޏަކަށް ވިއްކި މައްސަލާގައިވެސް އޭރުގެ އިދިކޮޅުން ވަނީ ބޮޑެތި މުޒާހަރާތައްކޮށް ދިވެހިންގެ މުދާ ރައްކާތެރިކޮށްފައިކަން ވެސް ހުސެއިންގެ ޕޯސްޓުގައި ފާހަގަކުރައްވާފައިވެއެވެ.

ދިވެހިންގެ ރާއްޖޭގައި ދިވެހިން ދިފާއު ކުރާނެ، ދިވެހިންގެ ހައްގުގައި ވަކާލާތު ކުރާނެ ބަޔަކު ތިބި ކަމަށް ގަބޫލުކޮށް އެކަމުގެ ހިތްހަމަޖެހުމުގައި ވޯޓު ދީ ވެރިކަމަށް ގެނައި ފަރާތްތަކުން ވެރިކަމަށް 07 މަސްވީއިރު ދިވެހިރާއްޖޭގެ މައި ސީ ޕޯޓް ވިއްކާލުމުން ހާމަވެގެންދަނީ އެ ފަރާތްތަކުން ރައްޔިތުންގެ ލޮލޮގައި އަނދުން އަޅުވާ ރައްޔިތުން މޮޔަ ހައްދާލާފައިވާވަރުކަން މިއަދު ދިވެހިން ގަބޫލުކުރާނެކަމަށްވެސް އެ ޕޯސްޓުގައިވަނީ ހާމަކޮށްފައެވެ..

ކޮންމެ އިރަކު ކުރިއަސް ދިވެހިންގެ މުދާ ވިއްކުމަށް ދިވެހިން އަބަދުވެސް ދެކޮޅުވާނެ ކަމަށް ހުސައިން ވަހީދުވަނީ ވިދާޅުވެފައެވެ. ދިވެހިރާއްޖެ ދެކެ ލޯބިވާ ދިވެހިން މިފަދަ ކަންކަން ހުއްޓުވުމަށާއި ރާއްޖޭގެ ދިފާއުގައި މިފަދަ ކަންކަން ކުށްވެރިކޮށް ވަކާލާތުކުރައްވާނެ ކަަމަށްވެސް ސީޕީ ހުސައިން ވަހީދު ވަނީ ފާހަގަކޮށްފައެވެ.

ރާއްޖޭގެ މައި ޕޯޓް ވިއްކާލުމާއި ގުޅިގެން ގިނަ ބަޔެއްގެ ފާޑު ކިޔުން ސަރުކާރަށް އަންނަނީ އަމާޒުވަމުންނެވެ.