މާލެއިން މީހަކު ގެއްލިގެން ހޯދަން ފަށައިފިއެވެ.
މިކަން ހާމަކޮށްފައިވަނީ ފުލުހުން އެކްސްގައި ކުރި ޕޯސްޓެއްގައެވެ.
ފުލުހުން ބުނެފައިވާ ގޮތުގައި ގެއްލިގެން ހޯދަމުން ދަނީ ހ. ބްލޫސްކޫޕް ހުސައިން ޒިހާން (18އ) އެވެ.
އޭނާ އާއިލާއަށް ޚަބަރެއްނުވެ ގެއްލިފައިވާ ކަމަށް ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ކުރަމުންދާ ކަމަށާ ޒިހާން މިހާރު އުޅެނީ ހ. ބްލޫޑްރީމްގައި ކަމަށް ފުލުހުން މައުލޫމާތު ހިއްސާކޮށްފައިވެއެވެ.
އޭނާ އެންމެ ފަހުން ފެނިފައިވަނީ ޖޫން 21 ވަނަ ދުވަހު އޭނާ ދިރިއުޅޭ ގެއިން ކަމަށް އާއިލާއިން ފުލުހުންނަށް މައުލޫމާތުދީފައިވާ ކަމަށް ވެސް ވަނީ ހާމަކޮށްފައެވެ.
ޒިހާންއާ ގުޅޭ އެއްވެސް މައުލޫމާތެއް އެނގޭނަމަ ހިއްސާ ކުރުމަށް ފުލުހުން ވަނީ އެދިފައެވެ.
މި ފަހަކަށް އައިސް މާލެއިން ޒުވާނުން ގެއްލިގެން ރިޕޯޓުކުރުން ވަނީ އާންމުކަމަކަށް ވެފައެވެ.
