2023 ވަނަ އަހަރުގެ ރިޔާސީ އިންތިޚާބްގެ ކެމްޕެއިނާ ދިމާކޮށް ޕީޕިއެމް/ޕީއެންސީ ކޯލިޝަންގެ ލީޑަރުން އެއް ރާގެއްގައި ކިޔަމުން ދިޔައީ އެ ކޯލިޝަންގެ އޭރުގެ ލީޑަރު ރައީސް އަބްދުﷲ ޔާމީން އަބްދުލްގައްޔޫމް ނޫން ގޮތެއް ނެތްކަމަށެވެ. އެ ދުވަސްވަރު ވަނީ ފާޑުފާޑުގެ އަޑުތައް ވެސް އަރާފައެވެ. އެގޮތުން ފާހަގަކޮށްލެވޭ އެއް އަޑަކީ ރައީސް ޔާމީނަށް އިންތިޚާބްގައި ވާދަނުކުރެއްވޭ ހާލަތެއް އަތުވެއްޖެނަމަ ކޯލިޝަންގެ ފަރާތުން އޭރުގެ މާލޭ ސިޓީ ކައުންސިލްގެ މޭޔާރ އަދި އަދުގެ ރައީސް ޑރ މުހައްމަދު މުއިއްޒު ވާދަކުރެއްމެވެ. އަދި އެމަނިކުފާނުގެ ވަކި ކެމްޕެއިން ޓީމެއް ވެސް އުފައްދައިގެން އުޅޭކަމަށެވެ. ނަމަވެސް މިހުރިހާ ވާހަކަތަކެއް އެމަނިކުފާނު ވަނީ ދޮިގުކުރައްވާފައެވެ.

އަދި ކޯލިޝަންގެ ލީޑަރުން ވެސް ވަނީ ޕްލޭން އޭ، ބީ އަދި ސީ އަކީ ވެސް ރައީސް ޔާމީން ކަމަށް ވިދާޅުވެފައެވެ. ކޯލިޝަން ވަގުތީ ގޮތުން ހިންގެވުމާއި ހަވާލުވެ ހުންނެވި އަދުގެ މަޖިލިސް ރައީސް އަބްދުއްރަހީމް އަބްދުﷲ (އަދުރޭ) އަކީ އޭރު ނޫސްވެރިން ކުރާ ސުވާލުތަކަށް އަޑަށް ނިކަން ބާރު ލައިފައި ޖަވާބުދެއްވި ފަރާތެކެވެ. އެގޮތުން ނޫސްވެރިން ދެން ރައީސް ޔާމީނަށް ނުނިކުމެވިއްޖާ ކެންޑިޑޭޓެއްގެ ގޮތުގައި ނިކުމެވަޑައިގެންނަވާނީ ކޮން ފަރާތެއްްތޯ އެހުމުން އެދުވަހު ވެސް އަދުރޭ ވިދާޅުވީ ރައީސް ޔާމީން އަށް ނުނިކުމެވެންޏާ ދެން އެހެން މީހަކު އެ ކޯލިޝަނުން ނުނިކުންނާނެ ކަމަށެވެ.

ސުޕްރީމް ކޯޓުން ރައީސް ޔާމީންގެ ކެންޑިޑަސީ ބާތިލް ކުރުމާއި ގުޅިގެން ޕީޕީއެމް/ޕީއެންސީ ކޯލިޝަން ތެރެޔަށް ހީވީ އީދެއް އައިހެންނެވެ. އަދުރޭ ރައިސް ޔާމީންގެ އެދުމާއި އެއްގޮތަށް އިންތިޚާބު ބޮއިކޮޓުކުރަން މަަސައްކަތްކުރެއްވިއެވެ. ނަމަވެސް ކޯލިޝަންގެ ގިނަ ބަޔަކު އިންތިޚާބް ބޮއިކޮޓް ކުރަން ބޭނުން ނުވުމުން ޕާޓީގެ މެމްބަރުން ބޭނުންވާގޮތައް އިންތިޚާބަށް ކެންޑިޑޭޓެއް ނެރެން ރައީސް ޔާމީން ނިންމެވިއެވެ.

އެގޮތުން ޕްރައިމަރީ އެއް ބޭއްވިއެވެ. ޕްރައިމަރީގައި ވާދަކުރެއްވީ ޑރ މުއިއްޒުގެ އިތުރުން އާދަމް ޝަރީފެވެ. ޕްރައިމަރީ ކާމިޔާބު ކުރެއްވީ ޑރ މުއިއްޒެވެ. ސަބަބެއްވެސް ނެތިއެެއް ނޫނެވެ. ސިޓީ ކައުންސިލުން ގިނަ ބަޔަކަށް ވަޒީފާ ދިނީ އޭރު ހަމަ އެ ނިޔަތުގައެވެ.

ރިޔާސީ އިންތިޚާބްގެ ކެމްޕެއިން ފެށި ކޮންމެ ރަށަކަށް ވަޑައިގެން ރައީސް ޔާމީންގެ ނަންފުޅު ބޭނުންފުޅުކުރައްވައިގެން، އެމަނިކުފާނުގެ ނަމުގައި ހުސް ގޮނޑިއެއް ކޮންމެ ކެމްޕޭނު ޖަލްސާގައި ބަހައްޓަވައިގެން ކޮންމެ ޖަަލްސާއަކު ރައްޔިތުންނާއި މުޚާތަބު ކުރެއްވި އިރު އެމަނިކުފާނު މިނިވަން ކުރައްވާނެ ކަމަށް ވިދާޅުވެ ހެއްދެވީ މުޅީންވެސް އިތުރުފުޅެވެ.

ވެރިކަން ލިބުނު ހިސާބުން ރައީސް ޔާމީން މަތިން ހަނދުމަފުޅު ނެތުނެވެ. އެމަނިކުފާނު މިނިވަން ކުރަން މަސައްކަތް ނުކުރިތާ އެމަނިކުފާނަށް ލުޔެއެް ހޯދައިދެއްވަން ވެސް ވާހަކަތަކެއް އަދުރޭ ވެސް ރައީސް މުއިއެްޒުވެސް ނުދައްކަވައެވެ. ކަންކަން މިހެން އޮއްވާ ރައީސް ޔާމީން ޕީޕީއެމް އިން ވަކިވެވަޑައިގެން ޕީޕަލްސް ނޭޝަނަލް ފްރޮންޓްގެ ނަމުގައި އައު ސިޔާސީ ޕާޓީއެއް އުފެއްދިއެވެ. އަދުރޭ އަދި ރައީސް މުއިއްޒުގެ ވެސް ނިޔަތް އޭރުވެސް އޮތީ ފަޅައިއަރާފައެވެ.

ނަމަވެސް ބުޅާ އަމިއްލަ އަށް ގޯނިން ބޭރުމިވީ 23 ޖޫން 2024 ވަނަ ރޭ ޕީއެންސީ މައި ޖަގަހަ ހުޅުވުމަށް ބޭއްވި ރަސްމިއްޔާތުގައެވެ. އެގޮތުން އެ ޖަލްސާގައި އަދުރޭ ވަނީ ރައީސް ޔާމީންގެ ގޮތްޕުޅު އެނގިވަޑައިގަންނަވާތީ, ރިޔާސީ އިންތިޚާބުގެ ޓިކެޓް މިހާރުގެ ރައީސް، ރައީސް ޑރ. މުޢިއްޒަށް ދެއްވުމަށް ވިސްނެވިކަން ހާމަކުރައްވާފައިއެވެ. ނަމަވެސް ރިޔާސީ އިންތިޚާބާއި ދިމާކޮށް އެމަނިކުފާނު ދެއްކެވީ މިވާހަކަތަކާއި މުޅިން ހިލާފު ވާހަކަތަކެކެވެ.ފޯރީގައި ވާހަކަދައްކަމުން އަދުރޭ ވަނީ މާ ކުރިންވެސް އޭނަގެ ސިކުނޑީގައި އޮތީ ރައިސް ޑރ. މުއިއްޒުއަށް ޓިކެޓު ދިނުމަށް ކަން ހާމަކޮށްފައެވެ. އަދި ރައިސް ޔާމީންގެ އެދުމާއި އެއްގޮތަށް އިންތިޚާބު ބޮއިކޮޓުކުރަން މަަސައްކަތްކުރެއްވީ ދެއްކުންތެރިކަމަށް ކަންވެސް މިހާރު މިވަނީ ހާމަވެފައިއެވެ.

އަދުރޭ އަމިއްލަ އަތައް ގޮވީއެވެ. ބުޅާ މިއޮތީ ގޯނިން ބޭރުވެ އަމިއްލަ އިއުތިރާފުން ފަލީހަތް ވެފައެވެ.