އެމްއެމްއޭއިން 13.7 ބިލިއަން ރުފިޔާ ނަގާފައި ޗާޕް ނުކުރާކަމަށް ބުނިކަމުގައި ވީނަމަވެސް އެއީ ހަމަ ޗާޕް ކުރި ފައިސާ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ހޯމަ ދުވަހުގެ ރޭ ފްރޮންޓް އޮފީހުގައި ކުރިޔަށް ދިޔަ ޖަލްސާގައި ރައީސް މުއިއްޒު ދަރަނި ދައްކަވާ ނިންމާލީ ފައިސާ ޗާޕް ނުކޮށް ކަމަށް ވިދާޅުވުމާއި ގުޅިގެން އެ ވާހަކަތަކަށް ރައްދު ދެއްވަމުންނެވެ.

އެގޮތުން އެމަނިކުފާނު ވިދާޅުވީ ނޫޓު ޗާޕު ނުކޮށް ސަރުކާރު ހިންގާ ކަމަށް މި ސަރުކާރުން ބުނި ނަމަވެސް އެކަންކަމަށް ތަހުލީލީ ނަޒަރަކުން ބައްލަވާލައްވަން ބޭނުންފުޅުވާކަމަށެވެ.

2024 ވަނަ އަހަރުގެ ދައުލަތުގެ ބަޖެޓަކީ 50 ބިލިއަން ރުފިޔާ ކަަމަށް ވާއިރު 36 ބިލިއަން ރުފިޔާގެ އާމްދަނީ އެއް ލިބޭނެ ކަމަށް ލަފާކޮށްފައިވާކަން އެމަނިކުފާނު ވަނީ ފާހަގަކުރައްވާފައެވެ.

އެ 36 ބިލިއަން ރުފިޔާގެ ތެރެއިން މިހާތަނަށް އައި އިރު ލިބުނީ އެންމެ 12 ބިލިއަން ރުފިޔާ ކަމަށް ވެސް އެމަނިކުފާނު ވިދާޅުވިއެވެ.

އެހެންނަމަވެސް އާމްދަނީގެ ބޮޑުބައި ލިބެން ޖެހޭ ވަގުތު ފާއިތުވެފައިވާ ކަމަށާއި، އެ ހިސާބުން އިގްތިޞާދު ރަނގަޅަށް މަސައްކަތް ނުކުރާކަމަށް ބުނެވޭނެ ކަމަށް އެމަނިކުފާނު ވަނީ ވިދާޅުވެފައެވެ.

ފަތުރުވެރިން ރާއްޖެ އަންނަ ނިސްބަތް މަދުވެފައިވާ ކަމަށާއި އިގްތިޞާދުގައި ދުޅަހެޔޮކަމެއް ނެތް ކަމަށް ވެސް އެމަނިކުފާނު ވަނީ ފާހަގަކުރައްވާފައެވެ.

މިހާތަނަށް އައި އިރު މި ސަރުކާރަށް 18 ވަރަކަށް ބިލިއަން ރުފިޔާ ލިބިފައި އޮންނަން ވާނެ ކަމަށް ޤަބޫލުކުރައްވާ ކަމަށް ވިދާޅުވެ އެމަނިކުފާނު ވަނީ ސަރުކާރަށް ފާޑުކިޔުން އަމާޒުކުރައްވާފައެވެ.

ރުފިޔާ ޗާޕް ނުކުރާ ކަމަށް ބުނި ނަމަވެސް 12 ބިލިއަން ރުފިޔާ ވަދެގެން 13.7 ބިލިއަން ރުފިޔާ ޚަރަދު ކުރާނީ ކިހިނެތްތޯ ރައީސް ޔާމީން ވަނީ ސުވާލު އުފައްދަވާފައެވެ.

ސަރކިއުލޭޝަން ނުވަތަ ބާޒާރުގައި ނެތް ފައިސާ އެމްއެމްއޭ އިން ނެގުމަކީ އެއީ ފައިސާ ޗާޕުކުރުން ކަމަށް ރައީސް ޔާމީން ވިދާޅުވިއެވެ.

އެމްއެމްއޭއިން ފައިސާ ނެގުމަކީ ފައިސާ ޗާޕްކުރުން ކަމަށް ވެސް ރައީސް ޔާމީން ވަނީ ވިދާޅުވެފައެވެ.