20 ވަނަ ރައްޔިތުންގެ މަޖިލީހުން އަމަލުކުރުމަށް އެކުލަވާލާ ގަވާއިދުގެ މަސައްކަތް ކުރުމަށް އާންމު ކޮމިޓީއަށް ދީފައިވާ މުއްދަތު އެ ކޮމިޓީން އެދިގެން އިތުރު އެއް މަސް ދުވަހަށް އިތުރު ކުރުމަށް މިއަދުގެ މަޖިލިސް ޖަލްސާގައި ފާސްކޮށްފި އެވެ.

މިދިޔަ މަހު ހުވާކުރި މަޖިލީހުން އަމަލުކުރަމުންދަނީ އައު ގަވާއިދެއް އެކުލަވާލެވެންދެން 19 ވަނަ ރައްޔިތުންގެ މަޖިލީހުން އަމަލުކުރި ގަވާއިދަށެވެ.

20 ވަނަ މަޖިލީހުގެ މެމްބަރުން ހުވާ ކުރެއްވުމަށްފަހު އެ ދުވަހު ކުރިޔަށްދިޔަ މަޖިލީހުގެ ޖަލްސާގައި މަޖިލީހުގެ މަސައްކަތް މެދު ނުކެނޑި ކުރިއަށް ގެންދިއުމަށް ޓަކައި ކުރީގެ ގަވައިދު މިވަގުތަށް ދަމަހައްޓަން ހުށަހެޅުއްވީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ ޕީއެންސީ މެމްބަރު އިބްރާހީމް ފަލާހެވެ.

އެ ދުވަހު ފާސްކުރީ މި މަހުގެ 2 ގެ ކުރިން އާންމު ކޮމިޓީން އެ މަސައްކަތް ނިންމަން ޖެހޭނެ ކަމަށެވެ.

ނަމަވެސް އެ މަސައްކަތް އަދިވެސް ނިމިފައި ނުވެއެވެ.

އެހެންކަމުން މިއަދު ވަނީ އިތުރު އެއް މަސް ދުވަހަށް އެ މުއްދަތު ދަންމާލާފަ އެވެ.

މިޔާއެކު ގަވާއިދު ދެން ނިންމަން ޖެހޭނީ ޖުލައި 2 ވަނަ ދުވަހަށެވެ.

މިގޮތަށް ފާސްކުރީ މިއަދުގެ ޖަލްސާގައި ނެގި ވޯޓުގައި ބައިވެރިވި 83 މެމްބަރުންގެ އިއްތިފާގުންކަން ފާހަގަކޮށްލެވެއެވެ.