2013 އިން 2018އަށް ރައީސް އަބްދުﷲ ޔާމީންގެ ފަހި 5 އަހަރު ނިމުމުން އޭރު އެމަނިކުފާނާ އެންމެ އަރިސްކޮށް އުޅުނު ބައެއް މީހުން ޕީޕީއެމްގެ އޮޑިން ފުންމާލާ ބެޗިއެވެ. ރައީސް ޔާމީން ވިދާޅުވި ފަދައިން އެމަނިކުފާނަށް މީހުން ދަސްނުވީއެވެ.

އެއަށް ފަހު 2018 އިން 2023 އަށް އެމަނިކުފާނަށް ވެސް އަދި ޕީޕީއެމް ޕީއެންސީ ކޯލިޝަނަށާ ދިވެހި ރައްޔިތުންނަށްވެސް ކުރިމަތިލާން ޖެހުނީ ނުހަނު ދަތި އުނދަގޫ 5 އަހަރެވެ. އަނގަޔާ އަތާ ދިމާނުވެ މުޅި ގައުމު ދަރަނި ދަންތުރައެއްގައި ޖެހި ރައްޔިތުން ބިކަވިއެވެ.

ރައީސް ޔާމީން ހަމަ ހިލާ ގައުމު ބީވެ ދާން ފުރުސަތު ނުދެއްވާނެކަން އެނގޭތީ އެމަނިކުފާނު ހުރަގޭގައި ސިޔާސީ ކަސްތޮޅަކުން ކަސްތޮޅު އަޅުވާ ފަސް އަހަރު އެމަނިކުފާނަށް އަނިޔާ ދިނުުމުގައި އެމްޑީޕީއާ އެ މީހުންގެ އައުވާނުން ހޭދަކުރިއެވެ.

ދަތި އުނދަގޫ ފަސް އަހަރަށް ފަހު ރައީސް ޔާމީނަށް ވާދަ ނުކުރެވުމުން ދެން ރައްޔިތުން ނިންމީ އެމަނިކުފާނު ދައްކަވާ މީހަކަށް ވޯޓުދީ ގައުމު ސަލާމަތުގެ އައްސޭރިއަށް ވާސިލްކުރުމަށް އެ ރައްޔިތުންގެ ޒިންމާ އަދާކުރުމަށެވެ. ވޯޓުން ތަޅާ އެމްޑީޕީ ބަލިކުރިއެވެ.

ނަމަވެސް ވޯޓުގެ ދުވަސްވަރުން ފެށިގެން ފެންނަން ފެށި ބައެއް މޫނުތަކާ އެކު މޫސުން ބުނާހެން ހީވިއެވެ. ގައުމު ސިޔާސީ ގަދަ ކަނޑެއްގައި އަނެއްކާވެސް ލަސްތަކެއް ނުވެ ފަތަން ޖެހިދާނޭއެވެ. އެހެނީ ކުރިން ވެސް ދެންނެވި ފަދައިން ފެންނަން ފެށި ބައެއް މޫނުތަކަކީ 2018ގައި ރައީސް ޔާމީނަށް ވެރިކަން ގެއްލުމުން އެމަނިކުފާނާ ޕާޓީވެސް ބޮލާލާ ޖެހުމަށް ފަހު ކަލޭމެންނާ ކަލޭމެންނޭ ކިޔާ ދުވެ ފިލާ ރައްކާވި ބައިގަނޑުން ބައެއް މީހުން ކަމަށްވުމުންނެވެ.

އޭގެ ތެރޭގައި ހިމެނޭ އެއް މޫނަކީ 18 ވަނަ މަޖިލީހުގައި އިނގުރައިދޫ ދާއިރާ ތަމްސީލުކުރި އިބްރާހިމު ފާލަހުއެވެ. ފަލާހުއަކީ ފަސް އަހަރު ދުވަހު ބޮނދަ ޖަހައިގެން އޮތް ތަނެއްގައި އޮވެފައި ރިޔާސީ އިންތިހާބަށް ވައި ކުޑައިގައި ފުންމާލި ހްރޫޕުގެ މީހެކެވެ.

ފަސް އަހަރު ވަންދެން ޕީޕީއެމް ޕިއެންސީގެ އާންމުން މަގުމަތީގައި ކުރި އިހުތިޖާޖުތަކަށް ފާޑުކިޔަން ކޮފީ މޭޒުތަކުގައާ އަދި ކެފޭތަކުގައި އިން ފަލާހު ކުއްލިއަކަށް ފެނުނީ އޭރުގެ ޕީޕީއެމް ޕިއެންސީ ކޯލިޝަންގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުއާ ނުހަނު އަރިސްކޮށް އަރިކަށި ދަށުގައި ހުއްޓާއެވެ. އައީ އަޑިން ކަމެއް މަތިންކަމެއް ދެނެ ވޮޑިގެންވާނީ ހަމަ ހެއްދެވި ފަރާތެވެ.

ކޮންމެ އަކަސް ވެރިކަން ޕީޕީއެމް ޕީއެންސި ކޯލީޝަނަށް ލިބުމުން ދެން އެންމެ ގިނަ ބަޔަކު ފައި ވިއްދީ މަޖިލީހުގެ ޓިކެޓަށެވެ. އޭގެ ތެރޭގައި ކުރިން އަލުގަޑު ދެންނެވި ފަދައިން 2018 އިން 2023 އަށް އިސްލާހީ މަސައްކަތުގައި އެތައް ގުރުބާނީއެއް ވެ އެތައް އަނިޔާއެއް ތަހައްމަލުކުރި މީހުން ގިނައެވެ. ނަމަވެސް ޕީއެންސިުގެ ލީޑަރުންގެ މަކަރުވެރި ޜެވުމުން އެ އިސްލާހީ މަސައްކަތްތެރިންނަށް ދިނީ ފެނު ކައްކާ ބޮލީގެ އިއްޒަތެވެ. އެގޮތުން މަޖިލިސް ޓިކެޓުތައްވެސް ވެސް ތަބަކަށް ލާފާ ބަހާލީއެވެ.

އެއާއެކު ފާޑުކިޔުންތައް އަމާޒުވާން ފެށުމުން ނަމެއްގައި ޕްރައިމަރީއެއް ބާއްވާ އެތެރެ އެތެރެއިން ބޭނުންވާ މީހުން ހޮވާ ނިންމާލީ ގްރާސް ރޫތަށް ދޮން ކަޅުވެސް އަންގާ ނުލާއެވެ. އެގޮތުން އޭގެ ޓިކެޓެއް ލައްގާ ފަލާހުވެސް 20 ވަނަ މަޖިލީހަށް ނުކުތީ އުފަން ރަށް އިނގުރައިދޫ ހިމެނޭ އިނގުރައިދޫ ދާއިރާއަށެވެ.

މަޖިލީހުގެ ގޮނޑިއަށް ފަލާހު ރިޝްވަތާ ފައިސާ ބަހައިގެން ހޮވުނެވެ. މިހެން ބުނީމާ މަޖިލީހަށް ހާޒިރުވާން އެންގި އަސް ފަރުވާލެއް ނެތެވެ. އެއީ ހެކި ހުރުމުންނެވެ.

މަޖިލީހުގެ މެޖޯރިޓީ ލީޑަރުކަން ވެސް ފަލާހުއަށް ދިނީ ފަސް އަހަރު ޕީޕިއެމް ޕިއެންސީގައި ނުހަނު ބުރަ މަސައްކަތްކުރި ލިޑަރުންގެ ތެރެއިން ހިމެނޭ ލީޑަރުން ވެސް އެ މަޖިލީހުގައި ތިއްބައެވެ. އެއާއެކު ފަލާހުގެ އަސްލު ސޫރަ ދައްކަން ފެށިއެވެ. ފުރަތަމަ އިޒްރޭލާ ފަލަސްތީނުގެ މައްސަލައިގައެވެ. އެއީ ދެ ގައުމެއްގެ ދޭތެރޭގައި ހިނގާ ދާޚިލީ ކަމެއްކަމަށް ބުނެ ސަރުކާރުގެ ޚިޔާލު ހުރި ގޮތް ސަރުކާރު ތަމްސީލުކުރާ ޕާޓީގެ މެޖޯރިޓީ ލީޑަރު ހާމަކުރިއެވެ.

ދެން ފެނިގެން މިދިޔައީ މީގެ އެއް ރޭ ކުރިން ބޭއްވި ޖަލްސާއެއްގައި ފަލާހު ރާއްޖޭގެ ހަތަރު ވަނަ ބާރު، ނޫސްވެރިންނަށް އިންޒާރު ދިން މަންޒަރެވެ. މިއީ ދިވެހި ތާރީޚުގައިވެސް މިހާ ފާޅުކަން ބޮޑުކޮށް ދިވެހި ނޫސްވެރިންނަށް މީހަކު އިންޒާރުދިން ފުރަތަމަ ފަހަރެވެ.

ފާޑުކިޔުން އަމާޒުވުމުން ދިފާއުގައި ނުކުމެ ނޫސްވެރިންނަށް އިންޒާރު ދިންއިރު ރައީސް މުއިއްޒު ވެސް އިންނެވީ އަތް ޖައްސަވަންށެވެ. ފަހަރުގައި ނޫސްވެރިންނަށް ހުރަސް ނާޅުއްވާނަމޭ ތިމަން މަނިކުފާނުގެ ސަރުކާރެއްގައި ވިދާޅުވި ހަނދާން ނެތުނީ ތޯއްޗެކެވެ.

ކޮންމެ އަކަސް ނޫސްވެރިންނަށް އެންމެ ފުޅާކޮށް ނޫސްވެރިކަން ކުރަން ފުރުސަތު ދޭނެ ކަމަށް ބުނެ އައި ސަރުކާރު ޕާޓީގެ ޕީޖީ ލީޑަރު ނޫސްވެރިންނަސް އިންޒާރު ދިނީ ލައިވް ޓީވީގައެވެ. ބްރޮޑްކޮމް އާ މީޑިޔާ ކައުންސިލް ނިދާފައެވެ.

ކޮންެމެ އަކަސް 5 އަހަރު ދުވަހު އޮތް ތަނެއްގައި ބޮނދަ ޖަހައިގެން އޮވެ ރީޝާއަށް އިންޒާރުދިން އުސޫލުން މިހާރު ހޮރުން ނުކުމެ ވައިކުޑައިގައި ފުންމާލައިގެން ކިތަންމެ ބިރެއް ދެއްކިއަސް ސަރުކާރު ޒިންމާދާރުކުރުވަން މަސައްކަތްކުރާ ނޫސްވެރިން ފަހަތަށް ޖައްސާލެވޭނެއޭ ހީނުކުރައްޗެވެ.

އޭ މިހަރަ ފަލާހޫއެވެ. 5 އަހަރު އޮޑި ބަންނަން އޮވެފައި ވައި ކުޑައިގައި ފުންމާލައިގެން، އިސްލާހަށް މަސައްކަތްކުރި މީހުންނަށް ބިރު ދައްކަން ތިޔައީ ފަހެ ކާކު ހެއްޔެވެ؟

ބުނެލަން އޮތީ އެންމެ ވާހަކއެކެވެ. ބޭހާއި ނުކުޅޭތި ބަނޑި، ނޭނގި ހުއްޓާ އަދައިދާނޭ، ގޭ މަކޮޔާ ފިހިދާނޭ އެވެ.