އިންޑިއާ ކިބައިން ގައުމު ސަލާމަތް ކުރަން ނިކުމެ "އިންޑިއާ އައުޓް" ގޮަވައި، ގައުމުގެ ވެރިކަން ލިބުމުން ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޑައިގެންނެވީ އިންޑިއާގެ ބޮޑުވަޒީރު ނަރެންދުރަ މޯދީ ކައިރިއަށް ނާށިގަނޑު ހިފައިގެން ސަލާން ޖަހަން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ދަ ފްރޮންޓު އޮފީހުގައި ހޯމަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ގައުމުގެ މިނިވަންކަމާ އިސްތިގުލާލު ނުރައްކަލަށް ހުށަހެޅިފައިވާތީ އެކަމާ ކަންބޮޑުވުން ފާޅުކުރައްވަމުން ރައީސް ޔާމީން ވިދާޅުވީ، ޓީޝާޓު ލައިގެން ނުކުމެ އެންމެ ބާރަށް އިންޑިއާ އައުޓު ގޮވި މީހުންނަށް މިހާރު ވެރިކަމުގެ އާރާ ބާރު ލިބުމުން އިންޑިއާއާ ދެކޮޅަށް ބަހެއް ބުނެ އިންޑިއާ އައުޓު ގޮވާލަން ނުކެރޭ ކަމަށެވެ.

އެގޮތުން ރައީސް ޔާމީން ވަނީ މި ސަރުކާރުގެ ވެރިންނަށް އިންޑިއާއާ މެދު ފިޔަވަޅު އަޅަން ނުކެރި ފަހަތު ފަޔަށް ބުރަވެފައިވާ ކަން ފާހަގަކުރައްވާފައެވެ. ރައީސް ޔާމީން ވިދާޅުވީ، އިންޑިއާ އައުޓު ގޮވި މީހުންނަށް، ވެރިކަމަށް އައުމަށް ފަހު ކުރީގެ ރައީސުލްޖުމްހޫއްރިއްޔާ އިބްރާހިމު މުހައްމަދު ސޯލިހު ގާނޫނާ ޚިލާފަށް ނެރުނު ގަރާރުވެސް ބާޠިލުކުރަން ނުކެރުނު ކަމަށާ އަދި އެމަނިކުފާނުގެ ގެކޮޅުގައި ދަމާފައި ހުއްޓާ ފުލުހުން ގެންދިޔަ އިންޑިއާ އައުޓު ބެނަރތައް ވެސް އަނބުރާ ރައްދު ކޮށްލަންވެސް ނުކެރުނު ކަމަށެވެ.

އެހެންކަމުން ސަރުކާރުންގެ ވެރިން ފިތިފައި ތިބި މިންވަރު ހާމަވާ ކަމަށް ރައީސް ޔާމީން ވިދާޅުވިއެވެ.

މިސަރުކާރުން ކުރާ ކަންކަމުގައި ދެފުށް ނުފެންނަކަން ފާހަގަ ކުރައްވައި ރައީސް ޔާމީން ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. ރައީސް ޔާމީން ވިދާޅުވީ އެމަނިކުފާނާ ސަރުކާރާ ދެކޮޅު ނޫން ކަމަށާ ނަމަވެސް ސަރުކާރު ޒިންމާދާރު ކުރަން ޖެހިއްޖެނަމަ އެކަން ކުރައްވާނެ ކަމަށެވެ.