އައްޑޫ މަސްވެރިން ހުއްޓުމެއް ނެތި ކުރަމުންދާ މުޒާހަރާގައި ރާއްޖޭގެ އެހެން ހުރިހާ މަސްވެރިން ބައިވެރިވުމަށް ގޮވާލައިފިއެވެ.
އައްޑޫގައި ހުކުރު ދުވަހު ކުރަން ފެށި މުޒާހަރައިގެ އަދާހަމަ ހޯދާލުމަށް ތޭރަ އޮންލައިންއިން އެ މުޒާހަރާގެ އިސް މަސްވެރިއަކަށް ގުޅާލުމުން ބުނެފައިވަނީ އަދިވެސް ސަރުކާރުން މަސްވެރިންގެ ޑިމާންޑްތަކަށް އެދެވިގެންވާ ޖަވާބެއް ނުދޭ ކަމަށެވެ.
އެހެންކަމުން މަސްވެރިންނަށް ސަރުކާރުން އެދެވިގެން ޖަވާބެއް ދެން ދެން މުޒާހަރާ ކުރިއަށް ދާނެ ކަމަށާ މި މުޒާހަރާއަކީ ހުރިހާ މަސްވެރިންގެ ހައްގުގައި ކުރަމުންދާ މުޒާހަރާއެއް ކަމަށެވެ. އަދި މުޒާހަރާގައި ރާއްޖޭގެ އެކި ކަންކޮޅުތަކުން މަސްވެރިން ބައިވެރިވުމަކީ ވަރަށް ބޮޑު އެދުމެއް ކަމަށްވެސް އޭނާ ބުނެފައިވެއެވެ.
މަސްވެރިންނަށް މި ސަރުކާރުން ވެފައިވާ ވައުދުތައް ނުފުއްދައި، މަސްވެރިންނަށް ދޭން ޖެހޭ ފައިސާ ނުދޭތީ އައްޑޫގައި މަސްވެރިން މުޒާހަރާ ކުރަމުން އަންނަތާ ހަފްތާއަކާ ގާތްވެފައިވާއިރު، ބައެއް ރަށްރަށުގައި ވެސް މަސްވެރިންނަށް ފައިސާ ނުދޭތީ މުޒާހަރާ ކޮށްފައިވެއެވެ.
މި ސަރުކާރަކީ މަސް ކިރާތާ އެންމެ ލަސްވެގެން 48 ގަޑިއިރުގެ ތެރޭގައި ކިރާ މަހަށް ފައިސާ ދޭނެ ކަމުގެ ވައުދާއެކު އައި ސަރުކާރެއް ނަމަވެސް މަސްވެރިންނަށް ގަވާއިދުން ފައިސާ ނުދޭތީ މަސްވެރިން ގެންދަނީ އިހުތިޖާޖު ކުރަމުންނެވެ.
