ރިޔާސީ އިންތިޚާބްގެ ކެމްޕެއިން ދުވަސްވަރު އަދުގެ ރައީސް ޑރ މުހައްމަދު މުއިއްޒު ވައުދު ގޯނި ރައްޔިތުންގެ ކުރިމަތީ އޮއްސާލުމަށްފަހު ވިދާޅުވީ ކުރީގެ ރައީސް އިބްރާހިމް މުހައްމަދު ޞާލިހް މަޝްރޫޢުތައް ކުރިޔަށް ގެންދެވި "ސްލޯ" ކޮށެއް ތިމަންނާއެއް ނުގެންދަވާނަމެވެ. މަޝްރޫއުތައް ދާނީ ކުރިޔަށް ހަލުވިކޮށް ކަމަށް ވެސް ވިދާޅުވިއެވެ. ރައްޔިތުން އުންމީދުތަކެއް ކުރީ ވެސް ސަބަބެއް ނެތި ނޫން ކަން ސާފެވެ. އެހެން ނޫންތޯ؟

ދެން ވެރިކަމަށް އައުމަށްފަހު އިއުލާންކުރެއްވި މި ސަރުކާރުގެ އެންމެ ބޮޑު މަޝްރޫޢު ކަމަށްވާ "ރަސްމާލެ" އަށް ވީ ކިހިނެއްކަން ތިބޭފުޅުންނަށް ވެސް އެނގޭނެއެވެ. މަޝްރޫޢުއަށް ހިމެނި ބަޖެޓް މިދިޔަ މަޖިލީހުން ފާސްނުކުރުމުން، ބަޖެޓަކާ ނުލާވެސް 8 މަސް ދުވަސް ތެރޭ ހިއްކާ ނިންމަވާނެކަމަށް ވިދާޅުވިއެވެ.

އޭގެފަހުން މާލެ ސިޓީ ކައުންސިލްގެ މޭޔަރު ހުވާ ކުރެެއްވި ރަސްމިއްޔާތުގައި ދެން އިއުލާން ކުރެއްވީ "ރަސްމާލެ" އަށް ދާން ކަނޑު އަޑީގައި ޓަނަލެއް އަޅާނެ ވާހަކައެވެ. މަޝްރޫއުތައް އިއުލާންކުރައްވަން ރައީސް މުއިއްޒަށް ހާދަހާވާ ފަސޭހައެވެ. އިންސާނެއްގެ ވިސްނުމަށް ގެންނަންވެސް އުނދަގޫ ވާހަކަތަކެވެ. އަދި މިއުޅެނީ ރަސްމާލެ ހިއްކާ ނުނިމިއެވެ. އެތަނަށް ދާނެ ގޮތެއް އިއުލާން ކުރެއްވި އިރު ރަސްމާލެ ހިއްކާ ނިންމާނެ ގޮތެއް ވެސް ނުވިސްނަނީ ބާއެވެ. މިއަދު މިއޮތީ ރަސްމާލެ މަޝްރޫއު ޗޮކުން ގޮސްފައެވެ. އަނެއްކާ ވެސް ފައްޓަވާނެ ކަމަށް ކުރީ ރޭ އޮތް ޕީއެންސީ މައި ޖަގަހަ ހުޅުވުމުގެ ރަސްމިއްޔާތުގައި ވިދާޅުވެއްޖެއެވެ.

ވެރިކަމަށް 7 މަސްވެގެން ދިޔަ އިރު، އަދިވެސް ތުރުކީން ރާއްޖެ އަށް ކާޑު ހިފައިން ފުރި ބޯޓު ބަނދަރެެއް ނުކުރެއެވެ. ދުބާއީ އިން އާސަންދައިގެ ހިދުމަތް ލިބޭނެ ގޮތް ހަދައިދެއްވާނެ ކަމަށް ވިދާޅުވިއިރު އެކަން އޮތީ ކިހާ ހިސާބެއްގައި ކަމެއް ހާމައެއް ނުކޮށްދެވެއެެވެ.

ކެމްޕެއިން ދުވަސްވަރު ރަށްރަށަށް އިއުލާންކޮށްދެއްވި ބިން ހިއްކުމުގެ މަޝްރޫއުތަކާއި ހައުސިންގ ޔުނިޓް ތަކުގެ މަސައްކަތް އަދިވެސް ފެށިފައިނުވެއެވެ. މައިގަނޑު ގޮތެއްގައި ކުރަން ބުނި އެއްވެސް ކަމެއް އެކަށީގެންވާ ގޮތަކަށް ކުރެވިފައިނުވެއެވެ. އަދިވެސް ގެންދަވަނީ ހަމަ މަޝްރޫއުތައް އިއުލާންކުރަމުންނެވެ.

ޑޮލަރުގެ އަގު ހެޔޮ ކޮށްދެއްވާނެ ކަމަށް ވިދާޅުވި އިރު ޑޮލަރުގެ އަގު ކަޅު ބާޒާރުގައި އުޅެނީ އެހާ ވެސް މަތީ ރޭޓެއްގައެވެ. މެއި މަސް ނިމުމުގެ ކުރިން އީ-ވޮލެޓް ތައާރަފްކޮށްދެއްވާނެ ކަމަށް ވައުދުވިއިރު މެއި މަސް ނިމި ޖޫން މަސް ވެސް ނިމެނީއެވެ.

ސަރުކާރުގެ ޑެޕިޔުޓީންނަށް މިވަނީ ވަރަށް ބޮޑަށް އޮޅިފައެވެ. މީސްމިޑިޔާގައި "މުއިއްޒު ސްޕީޑް" ޖަހާފައި ރައީސް މުއިއްޒުގެ ފޮޓޯ އެއް ޕޯސްޓުކޮށްލުން ވަރަށް ވެސް ފަސޭހަވާނެއެވެ. ނަމަވެސް އެމަނިކުފާނުގެ ސްޕީޑްގައި މިހާތަނަށް ނިންމަން ބުނި އެއްވެސް ކަމެއް ނުނިންމާ ވާހަަކަ ބުނާކަށް ފަސޭހައެއް ނުވާނެކަން ޔަގީނެވެ.

މުއިއްޒު ސްޕީޑް ކިޔަސް އެ ސްޕީޑްގައި ކުރެވުނު ކަމެއް މި 7 މަސް ދުވަހު ފެންނާކަށް ނެތެވެ.