އިންވޭސިވް މެނިންގޯކޮކަލް (މެނިންޖައިޓިސް) ވޭދަނައިގައި 46 މީހަކު ގާތުން އެއްތާވި ކަމަށް ފާހަގަވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭ ހާމަކޮށްފައިވާ ގޮތުގައި، މެނިންގޯކޮކަލް (މެނިންޖައިޓިސް) ވޭދަނައިގައި ގާތުން އެއްތާވި މީހުންގެ ގޮތުގައި މިހާތަަނަށް 46 މީހަކު ފާހަގަވެފައިވާ ކަމަށާއި، އޭގެތެރެއިން ޕްރޮފިލެކްސިސް ދޭންޖެހޭ މީހުންނަށް ޕްރޮސިލެކްސިސް ދެވިފައިވާ ކަމަށެވެ.
މި އަހަރު ޙައްޖަށް ދިޔަ މީހުންގެ ތެރެއިން މެނިންޖައިޓިސް ކޭސް އެއް ފެނިފައިވާއިރު ބަލި ޖެހުނު ފަރާތްވަނީ ނިޔާވެފައެވެ. އެއީ ރާއްޖޭގެ ކުރީގެ މަޝްހޫރު ފުޓުބޯޅަ ތަރި މުހައްމަދު އާރިފު (ބަކާ)އެވެ.
އެ ކޭސްއާ އެކު އެޗްޕީއޭއިން ވަނީ އެކަމާ ގުޅިގެން އަޅަން ޖެހޭ ފިޔަވަޅުތައް އަޅަން ފަށާފައެވެ. އެގޮތުން ބައްޔާ ބެހޭގޮތުން މީހުން ހޭލުންތެރިކުރުމުގެ މަސައްކަތްތައްވެސް މިހާރު ވަނީ ފަށާފައެވެ. އަދި ވަކި ހައި ރިސްކް ގްރޫޕްތަކަށް ވެކްސިން ދިނުމަށް އެޗްޕީއޭއިން ވަނީ ލަފާ ދީފައިއެވެ.
އެގޮތުން، ދަތުރުވެރިންގެ ތެރޭގައި އުމްރާ އާއި ހައްޖަށް ދަތުރުކުރާ މީހުން ވެސް ހިމެނެ އެވެ. އަދި މެނިންޖޯކޮކަލް ބަލީގެ ނިސްބަތް މަތި ގައުމުތަކަށް ދަތުރުކުރި މީހުންވެސް މި ލިސްޓުގައި ހިމެނެއެވެ. ސިއްހީ ހާލަތް އާންމުގޮތެއްގައި ވެސް ގޯސްކޮށް ފަރުދުން ނުވަތަ ކޯރިން ޑިޒީސްއެއް ހުންނަ ފަރުދުން ހިމެނެއެވެ.
އެޗްޕީއޭއިން ބުނީ މިއަހަރު ހައްޖަށް ވަޑައިގެންނެވި ފަރާތްތަކުގެ ތެރެއިން މެނިންޖައިޓިސް ވެކްސިން އެއްވެސް ސަބަބަކާހުރެ ނުޖެހޭ ފަރާތްތައް ނުވަތަ ވެކްސިން ޖެހުމަށްފަހު ފުރުމާ ދެމެދު 14 ދުވަސް ހަމަނުވާ ފަރާތްތަކުގެ ތެރެއިން މިބަލީގެ އަލާމާތެއް ފެނިއްޖެނަމަ، ލަސްނުކޮށް ޑޮކްޓަރަށް ދެއްކުން މުހިއްމު ކަމަށެވެ.
މެނިންގޯކޮކަލް ބަލި ފެތުރެނީ ނޭވާލާ ނިޒާމުގެ ޒަރީއާއިންނެވެ. ބަލި ޖެހިފައިވާ މީހާއާ އެކު އެންމެ ގާތްކޮށް އުޅޭ ފަރާތްތަކަށް ބަލި ޖެހުމުގެ ފުރުސަތު ބޮޑެވެ. މި ބަލީގެ އަލާމާތްތައް ފެންނާނީ ބަލިޖެހޭތާ 1 ދުވަހާއި 10 ދުވަހާ ދެމެދުގައެވެ.
