މާފުށީ ޖަލުގައި ހައްޔަރުކޮށްފައިވާ ގައިދީންނަށް ފޯނާއި މަސްތުވާތަކެއްޗާއި އެހެނިހެން ސާމާނުތައް ފޯރުކޮށްދެމުން ދާކަމުގެ ތުހުމަތުގައި ފުލުހުންގެ އިދާރާއިން ރޭގައި ކުރިއަށް ގެންދިޔަ ޚާއްސަ އޮޕަރޭޝަންގައި މިހާތަނަށް 13 ކަރެކްޝަން އޮފިސަރުން ހައްޔަރުކޮށްފައިވާ ކަމަށް މައުލޫމާތު ލިބިއްޖެއެވެ.

ފުލުހުން ހާމަކޮށްފައިވާ ގޮތުގައި ހައްޔަރުކޮށްފައިވަނީ ކ.މާފުށިން 9 އޮފިސަރުންނާއި، ކ.ކާށީދޫ އިން 2 އޮފިސަރުންނާއި ހއ.އުތީމުން އޮފިސަރަކާއި އަދި މާލެއިން އޮފިސަރެއް ކަމަށެވެ. މީގެ އިތުރުން މި ފަރާތްތައް ހައްޔަރުކުރުމަށްފަހު، މި ފަރާތްތައް ދިރިއުޅޭ ގެތަށްވެސް ބަލާފާސްކޮށްފައިވާ ކަމަށް ފުލުހުން ހާމަކޮށްފައިވެއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ހޯމް މިނިސްޓަރ އަލީ އިހުސާން ރޭ ވިދާޅުވެފައިވަނީ މި އޮފިސަރުންގެ އެކައުންޓަށް މިދިޔަ އަހަރު އެކަނިވެސް 73.3 މިލިއަން ރުފިޔާ ޖަމާކޮށްފައިވާ ކަމަށެވެ.

މި އޮޕަރޭޝަން ކުރިއަށް ގެންގޮސްފައިވަނީ ފުލުހުންގެ އިންޓެލިޖެންސް އަށް ލިބިފައިވާ މައުލޫމާތަކާއި ގުޅިގެން ކަމަށްވެސް މިނިސްޓަރ ފާހަގަކުރެއްވިއެވެ.